評審一位模特兒迷唔迷人，好多時都係睇佢哋嘅外表，個樣夠唔夠靚同身材夠唔夠火辣，不過李有美就話畀大家知，要成為一位襟睇嘅模特兒，實力亦相當重要，好似佢就係一位內外兼備嘅好例子。
內外兼備呢四個字人人都知點解，只係對模特兒嚟講，內在美真係咁重要咩？所謂內在美不但指性格，最重要係擁有個人特質，先至可以帶畀大家有別於其他模特兒嘅感覺，而對於李有美嚟講，佢嘅內在美在於性格溫柔，予人親切感覺。據佢講自小受到家中長輩教導，要成為一位傳統嘅南韓女性，結果就培養出溫柔得嚟又堅強嘅性格，而佢估唔到呢種氣質竟然成為佢特點。
除此之外，佢擁有高學歷，畢業於美國德州州立大學，唔單止學識有番咁上下，更講得一口流利英語。既然佢曾喺海外留學，點解唔留喺外國發展，或者回國後從事其他工作呢？原來有美自細有個夢想就係成為模特兒，不過當時佢自覺身高及身材都難以達到標準，於是決心到海外求學，希望搵另一條出路。正所謂女大十八變，連佢都估唔到自己會嚟個第二次發育，個樣仲變得更加索，因此畢業後便回歸南韓投身模特兒界，一圓夢想。
李有美有樣貌又有身材，好快就獲得唔錯嘅人氣，更為多本雜誌拍攝寫真。模特兒事務所對佢亦相當睇重，眼見佢嘅知名度不斷提升，於是便安排佢以車模身份喺大邱舉辦嘅車展上登場，當日佢以一身貼身低胸迷你裙造型示人，火辣身材展露無遺，即時成為全場嘅焦點，加上佢獨特嘅氣質，令人氣飆升。雖然佢當日嘅演出有好多瑕疵，但係亦冇影響大家對佢嘅熱愛，更為佢打下一支強心針。及後佢喺釜山同首爾多個國際車展上登場，配合愈嚟愈性感嘅造型，令人見識到佢誘人嘅上圍魔力，同時令佢人氣推至頂峰。
雖然有美已經成為人氣模特兒，但係佢從未以賽車女郎身份亮相，佢解釋係因為怕曬，喺烈日當空嘅環境下驚會曬傷皮膚，故此由出道至今，都未以賽車女郎形象示人。除咗皮膚之外，有美亦好注重身材，原來佢屬於易肥體質，因此要節制飲食，同時要勤做運動Keep Fit，以保持玲瓏浮凸嘅身段。佢自爆曾經有段日子暴飲暴食又少做運動，結果變成水桶腰，搞到事務所勒令佢喺短時間內減肥，自此以後，佢便相當留意自己嘅體重同身材，希望以後能保持住最佳狀態示人。
簡介：李有美最為人印象深刻嘅地方，除咗溫柔嘅性格外，當然係激凸嘅上圍啦！不過佢覺得自己雙肩先至係最靚，因此佢平日喜歡穿着露膊衫，如果大家想見識佢嘅雙肩魅力，就要Click入呢個網站喇。
網址：http://cafe.daum.net/rarerabbit
出生地：首爾
身高：169cm
三圍：35-24-35
撰文：魂