女仔條腰對於整體美感上相當重要，因為即使上圍唔大、Pat Pat唔翹，但係腰肢纖幼的話一樣睇落曲線誘人，所以小弟一直都覺得女仔唔使花太多金錢去豐胸，勤做運動鍛煉出小蛇腰就已經足以引死麻甩佬喇！好似林由愛呢位寫真界新貴咁腰幼腿長，仲擁有一對F奶，實在完美！
家陣好多傳媒唔知係詞窮抑或係審美眼光差，只要係青春少艾都會稱為「女神」，搞到「女神」氾濫。而喺日本寫真界索女特別多，但係由於業界標準甚高，所以唔會輕易為索女「冊封」，而歷來被冠上「最強」或「女王」稱號者當然係實至名歸，好似「最強巨乳」熊田曜子、「美尻女王」秋山莉奈以及「纖腰女王」川崎彩等，至於被稱為「新纖腰女王」嘅林由愛亦一樣有資格孭得起呢個封號。
22歲嘅林由愛青春俏麗，精靈可愛又帶天真陽光氣息，一雙圓大眼睛富有攝人電力。阿妹樣子喺美女如雲嘅日本寫真界當中可能未必位列前茅，之不過佢嘅身材則可能連國際級名模亦自愧不如！身高5呎6吋嘅林由愛高挑而纖巧，上圍嘅F Cup純天然美巨乳雪白且外形美觀，從佢酥胸半露咁做出各種姿勢，可以見到呢對F奶彈力非凡，乃一等一好波！咁都未算，林由愛條腰僅得21吋咁幼，亦因為咁，被封為「新纖腰女王」。
林由愛喺今年1月成為雜誌《週刊Young Magazine》嘅封面女郎，其一流身材以及俏麗面孔深深吸引觀眾，成功取得大家注目，人氣火速爆升！其實林由愛早已出道，因為佢之前係一位兼職賽車女郎，後來參加「2018年日本Race Queen大獎」獲得新人部冠軍，現時仲以賽車女郎身份成為藝能團體「MFG」其中一員。
咁林由愛正職係做乜呢？就係喺一間科技公司做辦公室女郎。雖然林由愛已經打響名堂，寫真工作接唔停手，但係佢表示暫時唔會放棄正職，原因係同各同事相處得相當融洽又愉快，仲話自己夠膽去拍性感寫真都係多得同事們鼓勵添。大家可能會話鼓勵由愛去拍寫真嘅一定係班心邪嘅男同事，小弟覺得咁都唔出奇，係男人見到咁索嘅林由愛都會心動啦！不過大家又唔使擔心由愛嘅人身安全噃，因為阿妹除咗勤做運動健身，仲學習拳擊多年，所以阿妹唔只有睇頭，仲相當打得o架！
簡介：雖然林由愛喺寫真界備受注目，不過佢近期以賽車女郎身份工作為多，大家想留意阿妹嘅最新動向，可以Click上佢嘅社交網。
網址：https://twitter.com/h_yume_1018
年齡：22歲
身高：5呎6吋
三圍：35-21-33
撰文：賢