既然大台「沒女」都可以添食再拍，咁點解「沒女」唔可以出寫真先？當然可以，但咪誤會，呢班「沒女」唔係藝員嗰班，係已故紐約情色攝影大師Saul Leiter鏡頭下嘅「沒女」咋！點解話佢哋係「沒女」？皆因呢本叫《Saul Leiter: In My Room》嘅黑白寫真集收錄由1946年Saul Leiter抵達紐約，打後20年拍攝過嘅裸女照。Saul Leiter早喺70年代已構思推出裸女寫真集，可惜到佢離開人世都未能實現，大師職業生涯受盡敬重，作品主要喺《Esquire》、《Harper's Bazaar》及《British Vogue》等雜誌上發表。喺40、50年代嘅早期作品更被紐約攝影學院評為對後世攝影界有重要貢獻，不少作品被存放在博物館展覽，其中包括現代藝術博物館、惠特尼美術館及維多利亞與艾伯特博物館，堅係威震全球！但Saul Leiter為人極之低調，私生活非常神秘，反而令人更想了解佢嘅性格，難怪佢於2013年離世，至今先公開私人作品，依然令人期待！全書192頁，每頁都係黑白兼鬆郁朦，部分係40年代嘅裸女寫真，今日唔買，冇o架喇！