有個老闆，入場賭馬，是日手風甚順，中幾場連贏，尾場，橫掂贏咗，實行掟火藥煲，畀佢又掟中，收三萬幾，當佢大疊銀紙塞入袋之後，滿懷歡暢，離開馬場，突然，有個少女過來，低聲曰：「先生，你財帛露咗眼，今次唔掂，有三個飛仔跟住你。」
老闆回頭望吓，果然見幾個飛仔，眼甘甘望實，當堂面青，因為早就聽人講過，有一批箍頸黨，專在馬場（目及）實贏咗錢嘅人，一路跟尾，跟到可以落手之時就做世界，大概幾個飛仔就係呢類人。少女伸手入佢臂彎，曰：「唔使驚，我可以保護你。」
老闆曰：「真唔真？你一個女仔，點有力量？」
少女曰：「你估我又係好人，我都係三山五嶽人馬，我上咗手，行家就唔會埋嚟食我夾棍，所以我在你身邊，即係保護你，不過你要送番多少保護費畀我至得。」
老闆曰：「當然，如果你能夠保護我，豈有話唔報答你之理。」
少女曰：「咁由現在起，你唔好再望佢哋一眼，我哋就好似情侶一樣，出到外面，坐上汽車，我送你到安全地點。」
老闆如其言，與少女一同離開馬場，散場時候，塞滿人，冇車可坐，少女曰：「阿哥，你打算送番幾多錢畀我？」
老闆曰：「五百夠未？」
少女曰：「你都可算冇良心，如果畀幾個飛仔打劫，洗你袋之後，講唔定會加多兩刀！如果你咁冇良心，現在就分手，算我白送你一程。」
老闆驚起上來，連忙拖實少女，曰：「你話幾多至夠，唔好咁快分手，我仍要請你食飯。」
少女曰：「最少都三千啦。」
老闆曰：「得，冇問題。」
行到出去大馬路，截一部的士。
司機將車開到門口，少女曰：「此處有餐廳，又有酒店，你想點都得。」坐落餐廳，老闆如言過水三千。
少女曰：「想唔想同我上去酒店開心吓，我會令你欲仙欲死（口架）！」
老闆諗到呢個女咁飛沙走石，實在冇膽，曰：「第日先，今日好疲倦。」
一九七五年一月二十三日