有個女星拍過一兩部片都係配角，做極都紅唔起，有個軍師，同佢幾傾得埋，獻計曰：「阿女，如果你想紅，我睇都係要行捷徑，因為講武，你唔打得，唔識連環六腳七腿，講文，你唔夠純情，不過現在都唔論你純抑或唔純，一樣唔掂，你知唔知捷徑係乜？」
女星曰：「是否同波士拉吓交情？」
軍師曰：「呢層不在話下，我所講嘅捷徑，係剝光豬，人哋剝三分之二，你就剝夠三分之三。」
女曰：「即係除清光？如果確係有效，剝光又點話，最怕係剝咗都唔得，我知道有個阿姐，脫咗兩次都未紅，到第三次，導演曰：『都係釘蓋多過食飯，觀眾對此種身材，冇乜刺激。』呢位阿姐喊咗一場，從此收山。」
軍師曰：「佢唔夠橋而已，如果你脫又唔同，我會分分鐘提點住你。」
女星在軍師指引之下，與製片家見面，話明肯剝光豬，於是製片家開套香艷片畀佢做女主角，因為大部分係床上戲，所以拍攝進度快得驚人。
十零日就拍晒全片，軍師選出幾張全裸照片用作宣傳，果然幾日之後，不少人見過女星嘅裸體劇照，都大讚幾好波路。
再過幾日，女星招待記者，話從此以後，不再拍裸體片，因為男朋友唔高興，所以從今之後，決不再脫，將來演戲，決以演技取勝。
女星嘅新片推出後幾受歡迎，雖然演技就談不上，木口木面，哭笑難分，不過剝光豬上鏡，卻幾有吸引力，不久，有第二間公司搵佢主演一套片，當然又係開正佢嗰瓣，要剝光豬，女星問價錢幾多？
製片家曰：「我願出雙倍。」
女星曰：「好，殺你，睇錢份上而已。」
新片又拍成，有個記者問佢，何以話咗唔脫又脫？
女星曰：「我話過不會再拍裸體片，如果劇情需要，我亦會脫。」
據說現在女星接到幾部片約，都係要脫清光，而女星亦脫到慣晒。
一九七五年一月二十六日