有個老闆，亦係玩家，一日，知道有間酒帘做唔住，要易手，招人合作或承頂，老闆忽發奇想，生意做過不少，呢味生意未做過，不妨玩吓，於是與店主接觸，索價五萬元，老闆曰：「就係得一批爛枱爛椅，乜都冇，點能收咁多頂手費。」結果以三萬元成交。
架步地方細細，老闆接手後，與舊人商量，如何經營至會興旺？有個大班曰：「如果借三千元上期畀我，則負責搵多兩批女返來，有女自然有生意了。」
老闆曰：「如果冇錢借呢？」
大班曰：「冇銀當然冇感情，我哋會拉大隊走人。」
老闆曰：「不論任何人，包括職員、小姐及做清潔阿嬸，每人准借五百元，再多就歉難答應。」
於是，三個大班真係拉隊走人，但有五個小姐表示願意留下來。
呢間細架步，生意已經唔好，走剩五個唔係幾靚嘅小姐，更加舉目荒涼矣。
老闆曰：「現在走清光，只剩你哋幾個，唔使驚，我有計劃搞到好熱鬧，你哋所借之五百元，待公司生意好，你哋人人收入唔錯先至還都未遲，我現在要裝修，停業一段時期。」
於是，將全間架步拆通，本來有十五間大鐘房，改為十間，全部鋪晒地氈、乳膠床、浴缸、內線電話、入牆燈光，裝修好之後，對五個小姐曰：「現在如此設備，唔愁冇人客，亦唔愁冇小姐，但我暫時拒絕新小姐投入，所有生意，由你哋五個人應付，我升做潔潔嘅五姐做場務總管，另外請過個女工，價錢照舊，免收大房費。」
幾個女大喜，曰：「客人一定會爆場。」
重新開張後，人客試過，人人讚抵到爛，一星期後就爆棚，未有小姐之人客，一律請入設備豪華之大鐘房休息，聽吓音樂，於是，五個小姐做到裙拉褲甩，完全冇時間休息。
半個月後，都覺得太辛苦，頂唔順，要求老闆加新人，老闆乃精選五個靚女，每人配一間房，由佢哋自己布置成香閨模樣，老闆亦逐漸將價錢提高，但係依然日爆夜爆，有錢賺矣。
一九七四年十二月十三日
「架步」原指秘密場所，源自清朝時嘅天地會，由於天地會幫眾需要秘竇聚會，為方便幫眾搵到秘竇所在，故此會擺設名為「架式」嘅石春陣指示方向，而幫眾則要按幫中傳授嘅「步法」行過石陣，否則被視為清廷奸細，架式加上步法便簡稱為「架步」。至於俗稱「架步」嘅色情場所，其實應該稱做「黃色架步」至啱。