江仔有個老友阿丁，十年闊別，突然自外國返來，據說要返來香港娶老婆，江仔曰：「你心目中之太太，形象如何，先講畀我知，先至可以為你物色。」
阿丁曰：「要樸素勤勞，身體健康，靚當然好，唔靚亦唔拘，娶妻求淑婦，唔計佢靚唔靚，不過豆皮崩口，就當然唔得，因為成世對住者也。」
是晚，江仔去到一間架步，搵着一個名笑萍之撈女，呢個笑萍，本來係工廠妹，因為失業，在【酒帘】撈住先，江仔試過，認為滿意，已經點唱過幾次，傾落，笑萍常嘆以後唔知點嫁人，江仔笑曰：「將來冇人要，我就娶埋你做妾侍。」
阿丁回港娶老婆，江仔就想起笑萍，是晚去到，曰：「笑萍，我介紹個老公畀你好唔好？」
笑萍曰：「講笑抑或真有其事？」
江仔曰：「真的，他是我個老友，由美國返來娶妻，要搵一個知慳識儉，樸素勤勞之人，你淪落風塵，乜都捱過，我認為最適合，明日，你來大喜事酒樓飲茶，認係我表妹，希望你哋有緣分，能夠結成夫婦。」
笑萍：「多謝，我明日來，即使你朋友認為不合，我亦多謝你。」
第二日，江仔介紹笑萍與阿丁見面，一見投緣，阿丁十分喜歡，江仔曰：「你哋兩人傾吓，我不能奉陪。」
過兩日，阿丁搵江仔，去婚姻註冊處做證人，登記結婚，原來兩人已經一見鍾情，閃電結成夫婦，在婚姻註冊處登記後，又去美國領事館登記。
阿丁趕住返美國，臨行，託江仔照顧笑萍，曰：「入境手續一辦妥，你就打點表妹來美國，你介紹一個好妻子給我，十分感謝。」又留低三千美元畀笑萍，預備起程之用。
笑萍已經辭職，冇做撈女，一日，接到通知，入境證已批出，問江仔曰：「我哋是否要打最後一場友誼波？」
江仔曰：「不可，你與我老友登記結婚後，就係我大嫂，朋友妻，不可窺，我哋始終係中國人，我哋以前之關係，唔好話畀阿丁知也。」
笑萍曰：「咁我錫你一啖算數。」
一九七四年十二月十一日
酒帘最早興起於上世紀60年代嘅油麻地，其後遍布九龍同香港，係由舞廳演化出嚟嘅玩法，分別在於前者囡囡年紀較大，後者主打青春少女。喺黑到用電筒照嘅酒帘內，玩家坐在由珠簾間隔開嘅廂座中同囡囡談心兼摸摸摷摷，摸到慾火焚身可到酒帘附設嘅大鐘房交易。後來警方掃蕩，唔畀設大鐘房、燈光要合乎標準等，令酒帘生意一落千丈，及至70年代開始式微。