銀両、銀牌、銀河系等呢啲同「銀」字有關嘅詞語，點睇都同情色世界扯唔上關係。但其實喺情慾字典中，跟銀同Silver有關嘅俚語確實有唔少，而以「銀」為題材嘅AV，亦有唔少經典作品。
中文俚語中有句「銀樣鑞槍頭」，意思即係話人中看不中用，用返廣東話講即係好睇唔好使，而用佢嚟形容一啲外形俊俏，床上工夫卻係麻麻嘅男士就至為貼切。不過情色英文中有冇類似嘅俚語呢？「Silver Dick」正係其中之一。「Silver Dick」原意指姿整嘅男士，後嚟慢慢引伸指空有外表嘅男士。作為男人都唔想自己嘅兵器畀人話佢長度不足，不過對於女性嚟講，最令佢哋滿意嘅兵器長度應該有幾長呢？英國健康網站Dr. Ed去年根據呢個問題，喺歐美進行咗一個調查。調查訪問咗1,148名男性及973名女性，結果發現西方女性平均最愛嘅長度係15.8厘米。不過調查卻同時發現，意大利男士嘅平均長度為15.3厘米，美國男士則有14.3厘米，而英國男士更只得12.4厘米。換言之，幾乎冇西方國家男士嘅兵器長度，可以滿足到歐美女性。大家又唔使咁擔心，事關呢個調查係針對西方社會進行，亞洲男士其實又唔使諗得太多。
英文俚語「Golden Shower」嘅意思，即係將「黃金聖水」灑在性伴侶身上嘅玩法。至於「Silver Shower」嘅玩法其實同「Golden Shower」一樣，都係咁重口味，唔係人人接受得到。話時話，究竟邊啲人喜歡呢種玩意呢？當然係有愉虐癖好嘅人士啦！而喺一啲另類主題嘅四仔，亦會出現呢種場面，坦白講，小弟我就真係冇興趣睇囉！
美國四仔界雖然大多數以美國妹為主，但亦有唔少嚟自其他國家嘅脫星演出，好似由美國四仔導演Fred J. Lincoln執導嘅作品《Silver Seduction》中嘅女主角Silver Forrest，就係嚟自荷蘭，身高5呎5吋嘅佢，最初以演員身份演出電影，其後投身成人電影界，並喺上世紀90年代初進軍美國四仔界。雖然佢擁有美艷嘅樣貌，但喺美國卻發展平平，直至演出《Silver Seduction》之後，憑住驚艷嘅造型，加上導演出色嘅功力，將佢打造成高貴中帶有淫味嘅形象，大受四仔迷歡迎，之後片約接個不停，1992至1993年更係佢四仔事業嘅高峰期。不過，後來因為多方面嘅原因，1994年佢淡出四仔界，令四仔迷感覺相當可惜。至於，Fred J. Lincoln喺美國四仔界絕對係一位殿堂級嘅導演，所執導嘅作品喺多個四仔頒獎禮上屢獲殊榮，佢更係AVN同XRCO嘅名人堂成員，可惜喺2013年1月17日因肺氣腫同心臟併發症，於洛杉磯家中病逝，享年76歲。
日本AV雖然唔少睇到人流晒鼻血，但同時亦有一啲睇到人眼都凸兼意義不明嘅作品，好似呢個由日本AV導演亞馬尻一家監督嘅《銀粉奴隸》系列就係其中之一。呢個系列最大嘅賣點，在於佢將AV女優從頭到腳，甚至連眼睛、牙齒同舌頭都塗上銀色，因此日本AV迷將佢跟另一位同樣鍾情銀粉題材嘅監督瞳耕介，並稱為兩大銀系奇葩AV導演。講番亞馬尻一家主理嘅《銀粉奴隸》系列，首部作品係由癡女女優矢部壽惠演出嘅《銀粉奴隸妻》，憑住奇怪嘅主題獲得極大回響，令如此騎呢嘅作品變成一個受注目嘅AV系列，而之後搵嚟嘅AV女優名氣更愈嚟愈大，分別有風間由美、保坂繪里、香山美櫻、篠宮友里同二宮和香，而喺今年2月推出嘅第6部系列作就係《銀粉奴隸演奏家》。除咗《銀粉奴隸》系列外，亞馬尻一家亦執導咗以金粉為主題嘅《金粉奴隸》及《銅粉奴隸》系列，睇嚟佢對金、銀及銅呢啲金屬色，真係情有獨鍾喎！
撰文：魂