日本成人漫畫喺唔少人心目中，總係三句唔埋就啪啪啪，而肉搏場面更係經常搞到汁液橫飛！不過呢啲只係大家嘅誤解，日本有唔少成人漫畫家憑住清新嘅劇情，配合少許鹽花，帶畀成漫迷與別不同嘅感覺，好似成漫家色白好嘅代表作《Softness Girl》，就係當中一個好例子。
早喺2000年色白好已經活躍於漫畫界，當時佢以創作全年齡向嘅青少年漫畫為主，畫工及故事技巧雖然稚嫩，但係筆下女角色嘅外形可愛吸引，獲得唔少讚賞。另外，由於佢畫巨乳美少女嘅技巧高超，故此其後轉向成人漫畫嘅創作。萌味十足嘅巨乳女角色，加上愈嚟愈成熟嘅故事技巧，令佢獲得極高人氣，2010年更喺成人漫畫月刊《Comic Unreal》上發表作品，憑住短篇作品《惡魔性道Ariel》，正式成為成人漫畫界一分子。同年佢被另一本成漫月刊《Namaiki!》睇中，自此以後成為佢發表作品嘅基地，同時創作更多元化嘅故事，而佢筆下角色嘅性格亦愈嚟愈細膩。
及至2012年1月，終於迎嚟首本成漫單行本作品，並得到成漫界極高嘅評價。食住處女單行本嘅人氣，同年3月乘勢推出第2本單行本，同樣得到大家嘅讚賞，奠定佢喺成漫界嘅地位。之後佢連載成漫作品《錯誤，Nice to Meet You》，喺2013年完結後，再開始連載另一以人妻為主題嘅作品《Netoraserare》，及至去年才完結。備受好評嘅兩篇連載作品獲得極大嘅回響後，佢喺今年5月連載最新成人漫畫《Gaishu Isshoku!》，須知道日本成漫界極少有連載漫畫，而佢可以做到呢點足證其人氣及實力極高。
至於色白好嘅代表作係《Softness Girl》，收錄咗10個短篇作品，當中包括《Open‧Campus》、《搖晃 奔跑 思念》、《夏天的洞穴理論》、《Yulayer》、《真正的企圖》、《兩位堂姊弟》、《性病醫生繪理香的憂鬱》、《20歲正確的喝酒方式》、《開發EX-Press》及《Open‧Room》。呢本作品發行後，日本成漫評論家都稱佢筆下角色嘅性格相當有真實感，故事亦充滿青春氣息，加上豐富嘅劇情令色慾場面更加精彩，尤其係《搖晃 奔跑 思念》同《夏天的洞穴理論》呢兩個故事，絕對唔可以錯過。
《搖晃 奔跑 思念》中嘅男主角今村浩介每朝都會去河堤練跑，目的只係為咗見巨乳美少女兼日本馬拉松新星長谷川千夏一面，希望有日能跟對方表白。為咗追到對方，浩介刻苦訓練自己，終於有一日佢成功同千夏傾偈，原來千夏一直因為自己胸部太大而煩惱，覺得會影響跑步，就喺呢個時候浩介同千夏唔小心一齊碌落斜坡，浩介乘機表白同鼓勵對方，大受感動嘅千夏唔再因為巨乳而煩惱，更同浩介啪啪啪起嚟。
至於《夏天的洞穴理論》講述男主角佐藤義春同山下美奈等一眾朋友趁住夏天到海灘玩樂，美奈見義春唔識游水，於是邀請對方一齊到附近嘅海蝕洞探險，兩人到達洞穴後卻遇上潮漲，被困嘅兩人被迫留喺洞內等潮退，此時美奈跟義春道歉，不過義春卻指因為美奈嘅善良，而被佢溫柔嘅性格所打動，並且鼓起勇氣跟對方表白，令美奈大為感動，結果兩人就喺洞內纏綿，一直到退潮為止。
書名：《Softness Girl》
作者：色白好
出版：竹書房
頁數：194頁
撰文：魂