制服誘惑係日本風俗店其中一種玩意，而呢種糅合男士對制服幻想，以及角色扮演元素嘅玩法，一直以嚟都吸引唔少玩家捧場。喺各種制服種類，如女僕服、OL套裝、水着、水手服等之中，大家又知唔知邊種制服最受日本玩家歡迎呢？
日本風俗店嘅制服玩法相信大家都唔會覺得陌生，不過大家又知唔知其實佢哋可以分為兩類呢？分別係主題型同提供各種制服嘅選擇型風俗店。前者以單一制服為主題，吸引喜好某種制服嘅玩家，例如女僕風俗店、護理員風俗店、兔女郎風俗店等；後者則係風俗店會預備多種唔同制服畀玩家選擇，之後讓風俗孃穿上並提供服務。
喺制服嘅設計上，亦有分真實型同性感型。所謂真實型即係當中嘅制服，跟現實生活中女性所穿着嘅制服一樣，例如JK制服，即係日本女子高中生校服。至於性感型，即係喺真實制服上進行修改，就以JK制服為例，本來係恤衫加及膝百褶裙，就變成開胸加激短百褶裙。
不過制服選擇有咁多款，邊款先係最受日本玩家歡迎呢？日本出張風俗資料網「高級Delivery Health」（高級デリヘル）做咗個調查，發現有5種制服零舍受玩家歡迎，不過大家要留意該調查範圍僅限於出張型風俗店，至於店舖型風俗店係唔包括在內o架！
聖誕服竟然成為出張制服風俗店嘅冠軍，係咪好出人意表呢？原來制服風俗店喺每年嘅12月都會推出期間限定嘅聖誕服，換言之，如果過咗呢個月份嘅話，就唔會再有呢種制服提供。有受訪玩家表示，佢哋如此鍾愛聖誕服嘅原因，係因為同身穿呢種制服嘅風俗孃接觸時好有過節嘅感覺，尤其係對於單身又冇朋友嘅玩家嚟講，足以彌補佢哋心靈嘅空虛！
呢度嘅體操服包括學園體育服、自由體操服、舞蹈服等，而佢之所以成為亞軍，有唔少受訪玩家表示，因為呢種體操服喺平時極少會見到，加上令佢哋有相當嘅回憶關係，所以極受日本風俗玩家歡迎。不過有受訪者指出，另一個令佢哋着迷嘅地方，在於唔少日本AV作品中嘅女優都鍾意以呢個造型登場，故此對佢哋零舍有吸引力。
學園水着源於二戰之後，日本教育部門規定中小學課程加入游泳一項，但有感當時嘅泳衣唔適合學生着，因此便按照比賽用泳衣進行修改，變成學園專用泳衣。正因為學園水着畀到日本玩家一種懷念已逝去青春嘅回憶，加上觸感滑溜，令人享受更佳嘅風俗體驗，所以成為最受歡迎制服系列嘅季軍。
呢個調查中嘅學園服，包括咗西式校服同水手服，佢嘅賣點相信唔使多講，就係能夠帶畀玩家青春嘅回憶，兼且喺日本有唔少玩家鍾情於上述兩種學園服，因此凡係制服風俗店，必然會有呢兩種學園服提供。不過話說回來，既然佢哋咁有人氣，點解會排第4位呢？理由係因為呢類學園服對穿着者嘅要求頗高，若然風俗孃唔夠青春味嘅話，效果會適得其反。
自從某品牌嘅俱樂部，以兔女郎制服作為服務員嘅制服後，呢種制服已經成為性感嘅象徵，事關佢嘅設計唔單止突出女性嘅胸部，高衩嘅設計更令臀部及雙腿充分呈現喺大家嘅眼前，因此日本出張風俗店嘅兔女郎制服，受玩家歡迎絕對係有理由。不過由於佢太性感關係，故此若然風俗孃身材冇番咁上下嘅話，有機會令視覺享受打折扣。
撰文：魂