雖然明知道佢係揼遊戲迷心口之作，卻只要製作認真嘅話，遊戲迷都會心甘情願拎個荷包出嚟，講緊嘅係近排喺日本紅到爆嘅十八禁遊戲開發商Sprite最新推出嘅DLC《蒼之彼方的四重奏 EXTRA 1》。DLC，即係Downloadable Content，透過網絡追加下載內容嘅意思。因為呢種做法成本低關係，故此深受遊戲開發商歡迎，但係好似Sprite咁逐個推出DLC角色，呢種唧牙膏嘅做法真係幾衰吓，但卻仍深受玩家歡迎，據聞遲啲仲會推出埋動畫添！
講到最新嘅DLC角色，就係人氣天后有坂真白。故事講佢向前輩晶也表白後，兩人過住幸福快樂嘅戀愛生活，不過喺學業上就一塌糊塗，同于莉佳及有梨華嘅烏冬麵同甜品對決亦完敗，就連明日香等人更當住佢面，自稱係晶也嘅女友，真白擔心再咁樣落去，唔單止男友會畀人搶走，連佢所經營嘅烏冬麵店亦會倒閉。正當佢徬徨無助之際，真白嘅母親提議佢同晶也喺夜晚嚟一個約會，真白思考一會後，決定「做個好食嘅便當，再好好打扮一番！」然後跟晶也約好見面日子，為咗可以重拾晶也對自己嘅愛，真白決定借助一眾好友之力，喺約會前嚟個魅力特訓，誓要以最迷人姿態示人，獲取晶也嘅心。
開發商：Sprite
售價：4,980日圓（約HK$349）
撰文：魂