以前喺內地夜場玩樂，卻又唔好彩斷正嘅玩家，最怕就係官方事後發放行動相片，皆因內地警方嘅一貫做法，就係會對傳媒統一發放掃黃嘅相片，而呢啲相片係唔會經過處理，即係玩家、囡囡及夜總會經理等人嘅面貌，都會呈現喺報紙上。近年內地講求文明執法，為咗保障被捕人士嘅身份，家陣官方相片都會喺男男女女嘅面上打晒格仔，才會發送畀傳媒。
最近四川瀘州嘅一宗掃黃案件中，官方嘅照片卻引起內地網民熱烈討論，點解呢？話說瀘州市江陽區公安分局警員對轄區內嘅洗浴按摩場所進行連環掃黃突擊行動，並喺一間洗浴中心內查獲3名女技師及3名玩家，喺包廂內以888至988元人民幣提供色情服務，連同喺其他場所嘅行動中，合共逮捕18名涉嫌色情活動嘅男女，而警方更將現場行動嘅照片透過網絡社交平台嘅官方帳號發放。當網民睇到行動照片後，卻感到大吃一驚！事關部分相片中嘅特殊屏蔽效果，竟然大到乜嘢都睇唔到，而被捕人士嘅樣貌更以水果、昆蟲、動物同可愛嘅Emoji圖案嚟遮蓋。有網民指有關方面嘅相片處理技術相當高超，亦有人稱可愛嘅公仔令相片嘅嚴肅氣氛被沖淡。不過更多人喺度討論，應唔應該遮住被捕人士嘅樣，理由係做得出唔怕見人，亦有人認為應該保障佢哋嘅私隱，唔知大家又點睇呢？
撰文：魂