內地有提供色情服務嘅夜場，為咗避過有關當局發現，最常嘅做法係隱蔽式經營，所謂隱蔽式，即係開設喺民居地方或偏遠地區，又或者以正經嘅店面作為掩飾，暗中經營色情生意，同時只喺半夜時分營業。不過呢種做法並非萬無一失，但唔係因為有民眾舉報，而係因為超大嘅用電同用水量，令人產生懷疑。大家都知夜場用電量一定會好大，尤其係邪骨場嘅用水量更係相當多，而當呢啲夜場遇上一啲細心嘅警察時，就會斷正。好似內地山東濟南解放路嘅一個淫竇，位於一幢大廈地下二層嘅原防空洞內，由於佢長時間閉門，從外面睇真係好難發現，加上只招呼熟客，故隱蔽性極高。點知轄區嘅警察發現，呢間經常閉門嘅場所用電及用水量相當高，因而引起懷疑，於是喺附近進行長時間埋伏，經過長達11日嘅埋伏搜證後，警方終於採取行動，警員入場後發現防空洞內不但設有8個房間，另外仲有廚房、休息室等設施，而喺現場逮捕34名女性及41名男性，合共75名涉黃人士。一個防空洞內竟然可以容納超過70人，就連警方亦始料不及，於是叫上級增援，有關人士亦被分流至附近5個派出所進行審查。