贏在起跑線上嘅滋味係點嘅呢？呢種滋味相信唔係太多人試過，而作為一位能夠贏在起跑線上嘅模特兒，佢除咗要擁有高挑身材外，仲要有迷人樣貌同埋火辣身材，最重要就係有觀眾緣，即係要成功入屋，先至可以成為一位人氣Model，而韓彩怡正係一個好例子。
出生於南韓首爾嘅韓彩怡，讀書時已經係個鶴立雞群嘅女生，皆因佢身材高挑，擁有一雙修長美腿及激凸上圍，不過當時佢夢想成為職業排球員，從未諗過做模特兒。喺一次偶然嘅機會，佢獲得一位從事攝影工作嘅朋友邀請，問佢有冇興趣兼職做模特兒，就係咁彩怡影咗人生第一輯寫真作品。2008年有模特兒事務所招攬佢轉做職業模特兒，不過當時佢因為長期練習排球，以致身體有唔少傷患，故此經過一番考慮後才答應。起初以平面寫真工作為主，雖然當時彩怡嘅樣貌同身材有啲嬰兒肥，但憑住迷人外表，好快就喺業界冒起。彩怡表示喺兼職模特兒時冇特別騷出事業線，而攝影師亦冇要求佢騷胸露肉，但係正式入行後，唔少攝影師都希望佢展露出又深又長嘅事業線，而佢先至發覺原來自己上圍咁有料到。
出道嘅第二年，彩怡喺首爾車展上以車模身份登場，呢次演出不但係佢首次喺大型車展上亮相，同時亦係佢初次面對大班觀眾及攝影師，雖然佢有演出經驗，但仍感到相當緊張，幸好佢嘅表現深得大家嘅歡心，自此人氣直線飆升，及後被一支賽車隊伍睇中，邀請佢成為車隊嘅專屬模特兒，所以大家可以喺賽車場上見到佢嘅蹤影。
從最初以平面攝影工作為主，到現今專注於車模及賽車女郎工作，彩怡一直憑住大方又「胸」惡嘅火辣形象成為鏡頭拍攝嘅焦點。不過喺鏡頭前表現得相當優雅嘅佢，原來喺鏡頭後係個活潑可愛嘅女生，據攝影師表示，喺攝影棚有佢出現嘅話，氣氛總會變得熱鬧，加上佢可愛嘅表情，實在討人歡喜。而彩怡對鏡頭嘅敏感度相當高，同時又知道攝影師嘅想法，每當佢見到有鏡頭對住自己時，便會自動轉到模特兒模式，冷酷地擺甫士，所以喺鏡頭前一直唔係有太多機會展現出真正嘅可愛性格。彩怡表示作為一位專業模特兒，最重要係予人大方優雅嘅形象，而真正嘅性格唔應該喺鏡頭前展現出嚟，因為佢係模特兒而非明星，真性情都係留番畀自己熟悉嘅人知道好啲。
做咗車模及賽車女郎一段日子，唔知彩怡有冇諗過往其他方向發展呢？例如進軍娛樂圈或樂壇？佢就話冇諗過向其他範疇發展，反而想成為一位更多元化嘅模特兒，而佢最希望喺遊戲展中以Cosplay模特兒身份登場，原來佢係個Cosplay迷，不過唔係自己玩Cosplay，而係鍾意睇人哋Cosplay，佢坦言冇乜膽穿着Cosplay服示人，因為自己未必扮得神似，不過如果係工作需要就唔同，首先既然有人搵佢Cosplay，即係覺得佢同所扮嘅角色有幾分神似，其次係佢唔識自製Cosplay服，如果有人幫忙嘅話，自己就可以輕鬆地滿足心願喇。
簡介：韓彩怡最令人印象深刻嘅地方，相信係佢激凸嘅上圍，以及深長嘅事業線莫屬。其實擁有高挑身材嘅佢，一對修長美腿同樣養眼，配合纖幼嘅蛇腰，如此迷人嘅外在條件，試問有邊個男士會唔鍾意呢？如果大家想了解佢多啲，見到佢可愛嘅一面，就要Click入呢個網喇。
網址：http://cafe.daum.net/chaei
出生地：首爾
身高：175cm
三圍：34、23、34
撰文：魂