藝術嘅嘢四仔迷識條毛咩！細佬唔識，更唔信各位會識，如果你堅持話識，咁麻煩話畀大家聽，Puma Swede究竟搞乜嘢？早前阿姐喺自己鄉下瑞典斯德哥爾摩舉辦個人藝術展，展出多件藝術作品，可說是性與慾嘅結晶，阿姐仲話希望展現到個人幽默同生活方式，結果好多人一件都睇唔明，其實佢自己明唔明嘅呢？
脫星同藝術近年經常扯上關係，或者「色情藝術」工作者份人零舍感性，得閒無事就諗啲天馬行空嘅嘢搞搞震。其實舊年底美國脫星Dani Daniels以Kira Lee之名喺紐約搞個人畫展，雖然稱唔上盛況空前，但總叫將脫星個朵「升呢」，之後阿妹再喺官網宣布今年推出個人設計胸圍底褲品牌，意味搵銀毋須再靠肉搏，值得慶賀！但唔少網友喺Dani畫展後表示，唔明白阿妹嘅畫有乜咁巴閉，擺明係靠脫星嘅名氣氹人入場。其實脫星玩藝術又何須太認真呢？好似Puma Swede由2005年落床砌，至今12年有多，從來都冇「安分守己」，鍾意就搞吓街頭裸跑，跟住又同法國脫星姊妹Frenchy Morgan開比堅尼洗車屋，前年又推出個人自傳，兼創立情趣玩具品牌，一般人睇就認定阿姐純粹搵銀，但Puma Swede話自己一生奉獻畀色情，一日未「冚蓋」，一日都有新搞作喎！
Puma Swede今次嘅個人Art Show名叫「Primal」，作為粉絲即使唔認同係藝術創作都會乖乖入場，無非係畀面派對啫，況且Puma Swede真係落足心機，為咗兩天嘅Art Show，特別成立網站ArtByPumaSwede.com簡介活動，又有個人作品畫預覽，有興趣嘅話仲可以即時網購，係咪好方便呢？話時話，呢啲正常人睇唔明嘅作品，據Puma Swede介紹分為兩大系列「F*CKART」及「COLLAGE」，報稱全部由阿姐親手製作，老實講「F*CKART」系列咁抽象唔好問我，反而後者多張作品玩拼貼，將阿姐過去咁多年嘅裸照拼為一張畫，其實四仔迷都做到啦，但佢夠膽開價四舊幾水美金一張，唔係死忠睇怕都唔會落疊囉！仲有呀，Puma Swede從來無交代「藝術」作品係獨一無二，好可能係長賣長有，以為入咗貨有得炒嘅真係諗清楚先好呀！
撰文：祖