和味春畫十八禁鹹作

「枕繪」「笑繪」「春畫」

日本嘅春宮圖叫「枕繪」，又叫做「笑繪」，亦有人稱佢做「春畫」，點解會咁嘅呢？原來最早呢類十八禁畫作，喺日本明治時期前通稱「枕繪」同「笑繪」，明治之後則叫做「春畫」。如果大家睇過春畫嘅話，會發現佢同古代中國嘅春宮圖有啲相似，實情係佢嘅出現，確實受中國嘅春宮圖所影響，加上17世紀嘅浮世繪喺日本興起，於是令同世界風情有密切關係嘅春畫開始興起。

不過有別於中國嘅春宮圖，雖然日本嘅春畫同樣繼承咗中國古代房中術嘅陰陽調和思想，但卻更加着重喺描繪男歡女愛嘅性行為上。畫中嘅角色唔單止係士族階層，亦有辮子中國人、紅鬚荷蘭人、相撲手、商販、軍人等各個階層及種族嘅人物，甚至有妖怪為主角。此外，春宮圖同春畫嘅最大分別，在於唔少春畫上都寫有大段文字，當中可以係講述男女性愛故事，亦可以好似葛飾北齋嘅著名春畫《海女與章魚》（蛸と海女）咁，透過一段極為色情嘅對話嚟帶出春畫嘅意境。

仲有一個絕對唔可以唔提嘅分別，春畫嘅性器官描繪，畫得誇張得嚟又相當細緻。巨根加上精細嘅繪畫，有人認為係同江戶時期，從荷蘭傳入日本嘅人體解剖圖有關。撇除當中嘅原因，正因為呢種誇張到違反現實嘅性器官比例，令日本嘅春畫更具視覺衝擊感。

不得不提　菱川師宣

要講日本嘅浮世繪春畫，不得不提有「浮世繪之祖」之稱嘅菱川師宣。呢位生於1618年，卒於1694年7月25日嘅畫家，不但開創浮世繪嘅繪畫形式，並憑住名畫作《見返美人圖》而被人稱道至今，而呢位名畫家亦畫過唔少春畫，當中名作更有畫集《枕邊絮語四十八手》，及單幅春畫《沖立之縵》、《低唱之後》等。

雖然喺菱川師宣出現之前，已有唔少手繪嘅春畫，但佢卻係木版春畫嘅開創人，同時又革新春畫嘅表達形式，以前嘅春畫題材以性愛體位同描繪房事為主，而佢嘅作品則着重喺描繪男歡女愛及性愛禮節上，同時透過木版印刷，令粗獷線條糅合細緻嘅人物樣貌，令畫作變得更加傳神。

驚世駭俗　葛飾北齋

唔少人都知生於1760年10月31日，卒於1849年5月10日嘅日本殿堂級畫家葛飾北齋，憑住《富嶽三十六景》一系列嘅風景畫而成名，其實佢亦創作過唔少經典春畫，當中最為驚世駭俗嘅，就係收錄於1814年浮世繪春畫集《喜能會之故真通》（喜能会之故真通）中嘅《海女與章魚》（蛸と海女）。呢個畫作不但傳頌至今，更係影響西方近代印象派畫家，如馬奈、高更、梵高等。

《喜能會之故真通》內容包括女房客、唐人、游女等主題，而當中一幅《海女與章魚》嘅題材，則係嚟自日本一個神話《大垣記》嘅故事。畫中嘅章魚大戰採珠女玉取姬，至今仍然相當出位，而畫中玉取姬同章魚嘅對話，更係極為三級，有興趣可以搵番原文嚟睇。除咗《喜能會之故真通》外，仲有春畫集《富久壽楚宇》等著名作品。

前衞性愛　鳥橋齋榮里

浮世繪畫家鳥橋齋榮里不但喺繪畫人物上有極高造詣，就連畫春畫同樣相當厲害，唔單止在於性器官逼真嘅描繪，主題至今仍然相當前衞，睇唔出佢竟然係江戶時代中期嘅浮世繪畫家！

呢位生於1795年，卒年不詳嘅畫家，春畫題材究竟有幾出位呢？好似其中幅名作《婦美之清書》（婦美の清書）中，就描繪兩位女同性戀者之間嘅性愛，一位胯下戴上假陽物，而另一位則用貝殼中嘅潤滑劑，用手塗喺假陽物之上，試問大家點估到當年日本已有假陽物同情趣潤滑劑呢？另外，佢喺描繪人物表情亦有一手，擅長透過人物嘅眼神，同誇張嘅腳趾動作，表現性愛嘅緊張纏綿感。

筆下美人　鈴木春信

以往春畫受制於印刷技術，色調只有3、4種顏色，其後「紅折繪」呢種可以有10幾種顏色，同時新印刷技術出現後，令春畫變得色彩豐富起嚟。首創呢種被稱為「錦繪」嘅多色印刷技術，並用於印刷春畫中，就係生於1724年，卒於1770年嘅浮世繪畫家鈴木春信。

鈴木嘅春畫特別之處，在於佢筆下嘅女性體態輕盈加上手足纖巧，倍有一種秀美感，有人認為佢嘅人物缺乏表情，其實當中係有原因嘅，因為佢嘅春畫相當有故事性，例如單幅春畫《雪球》，講述偷情丈夫被門外嘅妻子發現，於是妻子嬲到要向屋內掉雪球，因此冇表情嘅角色，更能引發大家嘅想像。另外，佢仲發展出漫畫風格嘅春畫，好似喺1770年印刊嘅12幅春畫集《風流艷色小豆人》（風流艶色真似ゑもん）中，講述一個身高如豆嘅人穿梭各性愛場境中，配合幽默嘅文字，令內容變得豐富。另外，其春畫集《風流閨室八景》同《蕩女鍳鏡圖》同樣相當有名。

撰文：魂