何謂人贓並獲呢？對台灣嘅色情場所嚟講，就係有齊色情服務嘅環境、用過嘅安全套同紙巾，當然唔少得場內數簿及現金，有齊晒呢啲證據，再加埋人證，即係色情場所負責人及一眾小姐，真係點打都打唔甩。喺上個月30日晚上8點，早已接到線報並埋伏監視多時嘅警方，決定對九如二路一間懷疑提供半套色情服務嘅養生館採取行動，當警員進入二樓包廂時，發現一位身上僅穿底褲嘅丁姓男玩家，同阮姓小姐以2,000新台幣（約500港元）嘅價錢享受完半套服務，因此丁男喺被捕時亦直認不諱。點知正當警員打算將店內收銀機內嘅8,500元新台幣（約2,125港元）現金作為證據之際，越南籍小姐就話收銀機內嘅錢係佢朋友嘅會金，但卻無法同警方交代朋友姓名，及點解會將其他人嘅財物放喺收銀機內，因此被警方識破只係藉口。話時話，乜嘢叫做會金呢？即係所謂嘅做會或標會，喺法律上稱為合會，係一種民間細額信貸模式。不過呢個臨急諗出嚟嘅藉口，其實都算個小姐有急智o架喇！