好多事情可以講唔可以做，亦有些事情可以做而唔可以講，有調查發現女仔最憎男仔亂咁問同亂咁錫。做運動有益身心，但係有研究顯示做運動太多會影響性趣。想令女性得到高潮唔係咁容易，不過原來靠聲音亦有機會令佢哋高潮迭起，到底係咩聲音呢？
男士們為咗討好女伴往往花盡心思，例如食餐飯都要做一輪網上搜尋工夫，睇吓邊間餐廳有情調，菜色又啱女伴口味。成功得到女伴首肯上床，又要花心思營造浪漫氣氛，之前仲要鍛煉體魄兼且學習調情技巧，希望可以令女伴快慰無比。之不過，男士雖然係肯做，但係做得啱唔啱又係另一回事。早前，日本雜誌《日刊SPA!》訪問咗多位20來歲嘅日本女仔，睇吓佢哋最怕男方喺床上做咩行為，結果最多女仔都話最怕男方上到床亂咁錫、亂咁舔，認為面部只宜輕吻，亂咁錫就會搞到面上嘅妝容走樣，唔得靚靚；而親吻腋下，女仔就會覺得對方有少少變態。另外，亦有女仔最怕聽到男方以命令式嘅語氣要求佢做乜做物，雖然女仔喺床上一般都比較被動，但係咁樣命令佢哋做嘢，就會搞到女仔覺得地位低微。亦有女仔表示最怕男方喺事後問佢哋覺得剛才床戰過唔過癮，以及男方嘅喘氣聲太大都唔鍾意，因為咁樣會將原本應有嘅浪漫氣氛完全破壞。
愈來愈多人鍾意做運動，仲有唔少人養成日日做運動嘅習慣，咁做當然係好事啦，既促進身體健康，亦係一種將壓力宣洩嘅良好途徑。不過，早前北卡羅萊納大學就有研究顯示做得運動多有利亦有弊，該研究搵來1,077名男士協助，而佢哋都有持續進行運動如跑步、舉重、游水、踩單車等習慣。經過研究之後，發現進行高強度運動嘅男士，比起只做低強度運動嘅男士性慾為低，另外每日至少做1小時運動嘅男士，其性慾亦較每日只係最多半小時運動嘅男人為低。咁又係，做咁多運動，體力都消耗得七七八八，仲邊度有多餘精力去做愛呢！所以，女士們如果想搵個熱衷性事嘅男士作伴，不妨考慮一下好似我呢種懶做運動嘅男人喇！
令女伴喺床上高潮迭起，相信係好多男士願意窮半生精力去研究嘅課題。為咗達到呢個目的，男士們除咗想盡法增強持久力以及進修床上技巧，亦會拜讀有關探索女性G點嘅書籍。其實要令女性高潮真係要咁麻煩咩？有研究發現女性喺運動嘅時候已經可以感受到高潮，亦有女士坐過山車時高潮迭起。另外，一種被稱為「衝擊波」（Blaster Beam）嘅聲音亦能夠令女士得到高潮！呢種聲音由知名演員以及音樂家Craig Huxley創作，多年前為經典電影《星空奇遇記》而創作呢種衝擊波作為其中一種音樂效果，喺1990年一場音樂會當中，佢亦有使用呢種音效，據悉當時令到多名女觀眾高潮一浪接一浪，事後有好多女士因此而對Craig Huxley大表讚揚。Craig Huxley表示呢種衝擊波可以刺激位於肚臍下方約5厘米處嘅骶骨脈輪，因此令女性得到高潮！不過，要製造呢種衝擊波音效需要特殊設備，但係Craig Huxley話鋼琴嘅E調與之相類似，大家不妨試試。
撰文：賢