漫畫迷嘅喜好各有不同，有人鍾意睇劇情，亦有人鍾意睇畫工，作為一本人氣佳作，如能兩者兼備自然最好。現實中真係有人能夠做到呢點，佢就係日本近年急速冒起嘅成人漫畫家駄菓子，其首本成漫單行本《純潔的終結日》更被視為經典之作。
唔少成漫家正式出道前，都會以成人漫畫同人圈作為踏腳石，透過喺同人圈發表作品，既可提升自己作畫嘅機會，同時能積聚人氣，而駄菓子卻有啲唔同，因為佢最初活躍於一般向漫畫同人圈「CONNECT」，並喺2006年推出首個單元故事《珈琲日和》。及至2007年8月，先至轉喺成漫同人圈「all over the Place」發表作品，並且推出首個成漫單元作品《朝霧○巫女 小真篇》。
由於呢段時期屬於摸索階段，佢嘅畫工有濃厚嘅模仿味道，內容亦相當多元化，從純愛到凌辱，甚至偽娘嘅題材都有！經過長時間探索後，佢憑住清新得嚟又有淡淡浪漫嘅劇情，獲得成漫迷認同，獨特嘅畫工更獲得線條能手之稱。佢擅於透過粗與幼，剛柔與散亂嘅線條，營造出角色唔同情緒，好似當心如鹿撞時就用散亂線條，當激情無比時就用粗線條等，令構圖變得豐富。
隨住人氣不斷攀升，佢終於喺2011年獲得成人漫畫月刊《COMIC快樂天BEAST》發表作品嘅機會。由於作品獲得極大好評，故至今仍以此作為發表作品基地，同時喺翌年迎嚟出道首本單行本作品《純潔的終結日》。
作為駄菓子首本單行本，《純潔的終結日》收錄咗佢喺2011年至2012年期間，於成漫月刊發表過嘅作品，當中包括《二人的青葱時間》、《午後的她》、《Little Road》、《鳥籠屋敷》、《今晚不行啊》、《對着我！》、《淹沒在摩天大廈》、《海風》、《偷窺的開端》、《按摩盛開》同《偷窺的開端 -After-》合共11個單元故事。據講該書出版當日，出版社嘅電話一直響個不停，唔少人想知道呢位成漫家嘅來歷，甚至有人稱書中所收錄嘅故事，縱然平心靜氣去睇，都會被佢引起無比慾望。講到當中最為人激讚嘅單元，首推《Little Road》同《今晚不行啊》。
《Little Road》講述情侶成瀨同悠一，雖然甜蜜如初，但一直維持柏拉圖式嘅純愛關係。每次二人約會後，例必一齊漫步返屋企，然後喺分岔路口告別。不過今晚成瀨同悠一講，話佢快將搬到遙遠嘅地方，因此係最後一次同男友共走回家路。為咗令今晚成為難忘一夜，成瀨邀請悠一返屋企，一場既甜蜜又苦澀嘅情慾夜就咁開始。激情過後，悠一向成瀨許下承諾，以後一定會轉到成瀨嘅新居附近工作。
《今晚不行啊》嘅男女主角小翔同琴音自小青梅竹馬，雖然佢哋唔承認戀人關係，但佢哋嘅屋企人同街坊早就視佢哋為一對。呢晚琴音拉住小翔參加兩個家族舉辦嘅祭典慶功酒宴，點知小翔卻話眼瞓而拒絕。其實參加酒宴只係藉口，因為今晚係琴音生日嘅前夕，好彩小翔並冇忘記送上生日禮物。滿心歡喜嘅琴音拆開禮物後，估唔到竟然係件超性感內衣！縱然佢表現憤怒，內心嘅慾望卻翻起暗湧。
漫畫名稱：《純潔的終結日》
作者：駄菓子
出版：WANI Magazine
頁數：211頁
撰文：魂