每個人都有唔同喜好，到底大家最鍾意喺邊一日同邊段時間進行性戰呢？男人想出軌，需要有不同條件嚟配合先可以成功，有調查發現原來光鮮嘅打扮係其中一個因素。專家話有半數女性面對缺乏性趣嘅問題，除咗尋求醫生之外，男士們亦可以幫手解決問題。
聽到女伴突然嬌嗲咁話：「喂，夜喇！夠鐘上床喇喎。」呢個時候作為男人一定要醒醒目目，千祈唔好話：「得喇！我今晚想夜啲瞓，你瞓先啦。」因為女伴話「上床」實在唔係話要瞓覺，真係想瞓又使乜特別講畀你知呢！不過話時話，上床做愛做的事，又係咪真係要夜晚做至好呢？早前英國網站Superdrug訪問咗2,000名成年英國男女，以了解一下英國人最鍾意喺邊段時間激戰，結果發現最多人選擇星期日早上9點，點解呢？有受訪者表示朝早起身朝氣勃勃容易有生理需要，而且星期日放假，心情特別輕鬆，故每次都可以盡情施為，更重要嘅係星期日晨操完之後可以繼續瞓番夠本，方便梅開二度。至於第二個多人揀嘅時間係星期六晚上10點半，第三就係星期六晚上11點半，原因都係因為第二日放假，所以星期六晚可以放心激戰。睇嚟，男女嘅房事與作息安排有莫大關係，日本出生率長期低落加上過勞死亡率又高，有關當局不妨安排多幾日假期等班打工仔多啲休息，又可以放肆地「造人」啦！
除咗天要下雨，娘要嫁人呢兩件事點擋都擋唔住之外，男人出軌嘅意圖一旦生起，想阻擋到佢哋亦係一件難事。之不過，所謂知己知彼，百戰百勝，女士們如果知道男人擁有邊一個條件容易吸引異性埋身，咁就能夠防範於未然。早前，日本就有一個調查訪問咗500名成年男士，問佢哋覺得身邊試過出軌嘅男友人憑咩能夠成功，而調查訪問男士嘅原因就係因為同「性」三分親，身邊男友人出軌通常都會透露口風畀佢哋知，所以從男人口中得出嘅答案相信更為精準。結果發現，最多人認為光鮮嘅打扮最重要，出軌嘅男人都相當注重打扮，喺女性面前顯得特別有魅力。第二係無規律嘅生活，令人以為男方冇女友，更重要嘅係一旦覺得悶，隨時可以搵到佢出嚟行街食飯。第三就係活動多多，女仔會覺得呢種男人生活多姿多采，同佢哋一齊一定唔會悶，就算明知對方有固定女友，亦會覺得男方有咁多活動，陪伴對方背住女友參加一次半次都唔會咁容易被發現。
撻車有時都會因為種種原因撻唔着，而男人喺床上未能成功撻着女伴，令女伴投入又興奮咁享受床戰就更為常見。之不過，咁樣未必係因為男方有問題，性學專家Clare Morrison表示研究發現近半女性長期處於性趣缺乏嘅狀態，更加有十分之一嘅女性患上性慾障礙相關病症。當然，問題嚴重就梗係要搵醫生幫手啦！至於發現女伴唔係因為患病，卻又提唔起性趣上床，男士們又可以點做呢？專家話呢個時候最重要就係溝通，問吓女伴覺得有咩唔妥，冇的話可以先講吓輕鬆嘅話題，因為壓力太大亦係減低性趣嘅因素。另外，平日培養良好運動習慣亦好重要，專家話運動幫助血液循環，女性嘅生殖器官能夠保持良好血液循環，性趣自然大增，但係就要記得補充水分，因為身體出現缺水狀況反而會令性趣減低。第三個方法就係多食羅勒葉，呢種葉有助促進血液循環，亦有催情作用，或者用羅勒葉精油做香薰一樣都得。
撰文：賢