男士們若嫌女伴喺床上玩得唔夠放，大可以同對方一齊睇鹹片，有研究話咁樣可以令女仔變得開放。好多人都會使用漱口水，原來漱口水仲幫助大家降低感染性病嘅機會。正所謂禍從口出，男仔想同女友關係長久啲，有咩唔可以講呢？
小弟溝女次數極多，但係成功次數極少，原因有好多，信心不足絕對係其中之一，點解會唔夠自信呢？小弟其貌不揚，身材又肥又矮，生怕肉帛相見嘅時候，對方會接受唔到小弟肥腫難分嘅身材，未入閘先脫腳。如果巴打都有咁嘅憂慮，一於喺開波前同女伴睇鹹片啦！早前荷蘭有一個研究，搵嚟一班後生女分為三組進行測試，安排一組睇鹹片，一組睇火車影片，一組就睇極限運動影片，然後再搵佢哋進行16次被認為係惡心嘅行為，例如飲一啖有一隻假昆蟲嘅果汁、搵一張用過嘅紙巾擦佢哋隻玉手、喺一隻震蛋上塗抹潤滑劑。負責研究嘅心理學專家Charmaine Borg就話結果顯示出，睇鹹片嘅女仔對各種被認為係惡心同核突嘅行為接受程度比其他兩組為高，換言之男士如果怕女伴唔係咁接受到自己嘅外表，大可以同女伴睇吓鹹片至上床，一來可以調情，二來令女伴更接受自己，同時令女伴接受到更激烈嘅玩法，增加床上歡愉。
我哋把口除咗用嚟飲食，亦可以用嚟同女仔錫錫，憑住三寸不爛之舌令對方喺床上高潮浪接浪。不過，我哋用口招呼對方嘅時候有感染以及傳播細菌之虞，咁點算好呢？我唔想害人，亦唔想受害喎！早前澳洲進行過一次研究，搵到196名男士協助，將佢哋分為兩組，一組喺為女方進行口舌服務之後用鹽水漱口，另一組則使用漱口水，結果發現前者口腔內嘅淋病細菌較使用鹽水漱口前減少16%，後者則減少48%，可見兩者效果分別相當大，而研究員提議男士們不妨喺事前事後都同女伴一齊用漱口水漱口，口氣清新啲，又可以減少感染性病以及傳播細菌機會，一舉兩得。
溝通好重要，但溝女唔係話同對方不斷有言語交流就叫做好，年中不知有幾多情侶因為男方講錯嘢而嗌交。早前，日本媒體《日刊SPA!》喺涉谷搵來多位女性協助，以了解佢哋最怕喺交往嘅時候聽到咩說話，結果發現佢哋最唔鍾意聽到對方話：「我係以結婚為前提同你交往嘅。」其實唔係咁多女仔一拍拖就諗住結婚，聽到男仔咁講，女仔會以為男方當佢係生仔機器同煮飯婆。其次就係：「我有乜唔好？」女仔唔好意思數落男方嘅不是，因為知道數完之後亦畀人數番轉頭，例如嫌男方冇錢，就會畀人話貪錢，嫌唔靚仔，就會畀人話太過沉迷睇男星。第三句就係：「前度女友唔差，不過……」女仔本身已經好介意男方提前女友，家陣仲話前女友唔差，女仔最鍾意就係比較，就算自己唔差得過前女友，相信都係質素相當，變相令女仔覺得自己唔夠特別、唔夠突出，分手已成定局。
撰文：賢