男人想揀個好身材嘅靚女做床伴，但係女方又何嘗唔想揀個床上好拍檔呢？咁點先能夠達到女方嘅要求呢？網絡社交平台成為男士溝女嘅渠道，有呢方面嘅專家提供箇中秘訣。關於勃起，男士們知道幾多呢？一陣話畀大家知。
現代社會講求自由戀愛，做愛亦然。喺搵女友嘅時候你揀人，人亦揀你，上到床亦係一樣，當你露出狼相之際，其實女方亦會考慮閣下喺體積、長度、衝刺力、持久力、硬度等等方面滿唔滿足到佢哋嘅需求。之不過，一次生，兩次熟，喺第一次發生之前，我哋又點樣話畀對方知道自己屬於一個床上好拍檔呢？英國兩性關係專家Katy Horwood話畀大家知需要注意幾個重點，第一要同對方有眼神交流，女仔畀男友望實會覺得自己喺男士心目中相當重要，上到床一定會被好好服侍。第二係專心聆聽女仔嘅說話，如果你平時聽女仔說話嘅時候表現得漫不經心，女方就會認為你個人容易疲勞及分心，喺床上一定交唔足功課。第三就係肯作新嘗試，女仔會覺得男方唔會係一個悶蛋，喺床上喜歡新奇又刺激嘅玩意，唔會只係識得用正常位。
依家溝女都會用WhatsApp、Facebook交流吓先，花一輪時間「摸底」，然後再約出街。早前日本網站「日刊SPA!」綜合咗多個透過上述途徑而成功溝到女嘅個案，從而歸納出箇中嘅成功秘訣。喺Facebook成功溝女並且「得米」嘅男士有幾個共通點，首先係上載嘅相片全部都打扮整潔斯文，女仔話咁樣予人舒適感及安全感。另一個共通點就係男方識飲識食，專門搵好多冷門食店，再將相關飲食情報放上Facebook。至於用WhatsApp溝女成功嘅例子當中，男士們會不斷向女仔有興趣嘅話題進攻。不過，最重要嘅共通點在於約到女仔出街之後，能夠成功將女方帶到上床嘅男士都會做一個動作，就係大讚女方「可愛」，同時跟女方有身體接觸。從中可以發現，讚美係幾咁有威力，幾咁容易令女仔放下戒心！男士們記住喇！
作為男人對自己嘅命根有幾了解？以勃起為例，原來分為三種，一種係晨勃，另一種係由性幻想引起嘅勃起，最後一種就係純粹生理反應，即係受到摩擦而產生。另外，每個男人平均每日勃起11次，其中3至5次喺熟睡時出現。男人去世之後亦會有勃起狀況出現，呢種現象被外國人稱之為「天使好色」（Angel Lust），點解會咁呢？出現嘅條件並不尋常，通常係死者過世後一直保持直立狀態，如此地心吸引會將其體內血液拉向下，血液往下流動就會令陽具充血產生勃起現象！香味亦會影響勃起，研究顯示效果最強嘅係南瓜批味混合薰衣草味，能夠令流向命根嘅血液流量增加40%之多！
撰文：賢