曾創作《純情房東俏房客》的漫畫家赤松健講過，漫畫家嘅生涯係不停畫，不斷嘗試新嘅風格，不斷有新靈感，先至有機會獲得成功。呢句說話一啲都冇誇張，日本成人漫畫家小澤田健吾就係一個好嘅例子，佢近年轉營至全年齡漫畫界發展，代表作《純情愛玩生化女友》，正正喺呢個背景下創作出嚟。
現居於千葉縣松戶市嘅小澤田健吾，間中會使用另一筆名OZAKEN推出作品。佢早喺2000年開始活躍於同人界並推出插畫作品，當時嘗試過很多題材，勇者冒險類、偵探類以至成人題材都有。不過講到踏入成人漫畫界，則要從2004年10月講起，當時佢獲得成人漫畫月刊《COMIC MUJIN》（現稱《COMIC夢幻轉生》）賞識，喺月刊發表作品如《FRIEND'S 姐姐》、《看見女更衣室‧發狂》、《奇妙的面具與我》等單元故事，而呢啲作品收錄咗喺2006年嘅處女單行本漫畫《ERO POP》內。不過當年嘅佢畫工只屬中上，故事性亦唔算太強，喺芸芸成漫家中並不突出。
雖然評價好壞參半，但佢仍然不斷創作，提升畫技之餘又嘗試唔同嘅畫風，經過其後嘅單行本《制服專科》、《GO SCHOOL !》、《發情OTOME》等作品，佢喺2012年推出《姬物語》終於獲得賞識，翌年嘅《純情愛玩生化女友》更被成漫迷視為頂峰之作。有別於初出道時嘅表現，呢兩本作品嘅畫工變得成熟，改以中篇長度創作故事，以營造角色性格及凝聚劇力，加上扣人心弦嘅愛情內容，配以汁液滿溢嘅情慾場面，成功令佢喺短時間冒起，坊間更有唔少要求將作品動畫化嘅聲音。
《純情愛玩生化女友》係佢第8本單行本作品，書中收錄咗曾於《COMIC MUJIN》人氣連載嘅《Believe Machine》共4話故事，大膽嘗試創作嘅《你用那雙眼眸說謊》前後編，以及喺《姬物語》嘅外傳故事《大名的小町天使外傳》。講到當中值得推介嘅部分，梗係講述男主角米田勝同機械少女愛情故事嘅《Believe Machine》。有晚米田勝同一腳踏兩船嘅女友分手，諗住去借酒澆愁，卻喺屋企門口遇到一個暈倒少女，由於佢冇帶手機嘅關係，於是將對方帶返屋企然後報警。點知少女醒番後，表示自己係個機械人，擔心被警方接走後難逃被研究嘅命運，因此希望米田勝收留；及後為機械人取名「優」，從此開始佢哋嘅同居生活。
以「主人開心我便感到滿足」為存在目標嘅優，雖然被設定為家務型機械人，但佢搜查到關於男性嘅需要，於是主動為米田勝解決生理所需。隨住兩人關係變得密切，米田勝漸漸唔再覺得優係機械人，甚至有愛上對方嘅感覺，而優亦慢慢覺得自己唔再視米田勝為主人，一種神奇嘅感覺從心底燃起。就喺米田勝以為可以同優共度一生時，有天早上優突然唔起身，一個星期、一個月、一年後，優始終冇晒反應。究竟米田勝嘅戀曲會唔會就咁終止呢？內容充滿洋葱味道。順帶一提，《你用那雙眼眸說謊》嘅劇情同畫風，同小澤田健吾以往嘅風格極之唔同，大家未必接受到之餘，佢亦特意喺漫畫中作出說明，大家要留意一下。
漫畫名稱：《純情愛玩生化女友》
作者：小澤田健吾
出版：MUJIN COMICS
頁數：223頁
撰文：魂