凡事太盡緣勢必早盡，好似做愛咁，縱慾過度當然唔好，但係禁慾一樣會對身體帶來壞處。現代人注重健康， 會定期做身體檢查，原來上網亦可以做個簡單檢查，睇吓感染「風流病」嘅機會高唔高。所謂過盈則溢，咁做愛太多又會點呢？早前就有人進行過一項相關嘅瘋狂實驗。
早前有調查顯示港人嘅快樂指數偏低，又有發現本地夫妻嘅房事頻密度亦偏低，仲有調查話港人健康指數頗低，唔通我哋香港人要做三低市民？點算好呢？以小弟愚見，大家不妨多與伴侶進行親密行為，除咗可以令大家關係更融洽、更愉快之外，無性生活實在有太多壞處喇！首先禁慾會令男士們增加患上不舉嘅風險，研究話每周做愛多於一次嘅男人比起每周只做一次嘅不舉風險減少一半。另外，做愛仲可以提升免疫能力，因為彼此纏綿期間會交換細菌，身體接觸到外來細菌往往就會激發起免疫系統運作，同時有助減壓，令精神同情緒都得以放鬆。做愛仲可以令人醒目啲，兼且更有創作能力，因為大腦中嘅海馬體喺做愛嘅時候細胞會加速生長。我成日都要創作，咪即係需要頻密啲享受閨房之樂咯。
好多風塵女子都自嘲自己一條玉臂千人枕，半點朱唇萬客嘗，咁如果同佢哋親熱一下，咪即係代表自己間接同成千上萬嘅麻甩佬親熱囉！其實就算唔出去滾，性伴侶為數不少的話，一樣會有此疑慮，想知道箇中風險的話，不妨Click上https://www.drfelix.co.uk/sexual-exposure-sti-risk-calculator/檢查一下喇！呢個性病風險計算器由一個叫「Dr Felix」嘅網站炮製，只要輸入所屬國家或城市、自己嘅性伴侶數目、對手平均性伴侶數目，咁就可以計算出你間接同幾多個人「扯上關係」，分析出淋病、愛滋病、疱疹等8項因性接觸而感染嘅常見疾病對你有幾大風險。相信檢查完之後，肯定會令好多人都唔敢四圍拈花惹草喇！
前年興起冰桶挑戰，挑戰者會用一桶冰水淋自己，目的係幫漸凍人症相關組織籌款。早前就有情侶唔玩冰，而係嚟個火辣辣挑戰，名為「30 Days Of Sex Challenge」，參加嘅情侶要喺30日之內每日做愛一次，每次做15分鐘，睇吓每日都有性愛係咪會好似啲兩性關係專家所講，令情侶關係更親密、更開心，結果係點呢？唔少接受挑戰嘅情侶喺一個星期後就放棄，能夠完成兩個星期挑戰嘅情侶亦大吐苦水，表示每日做愛只不過係為咗洩射，唔覺得真係想令大家得到快樂而行房，直情係失去做愛嘅意義。小弟都覺得日日做愛都幾辛苦，咁搞法容乜易影響情侶關係，一陣對方話做厭咗，要換伴侶就真係弊傢伙！
撰文：賢