Axel Braun哥，金牌四仔導演又點喎！你「吹雞」四仔迷就一定Buy你咩？之前都話咗你一定衰，今日仲唔斷到應一應！還記得早前《星戰》上畫，向來鍾意惡搞嘅Axel Braun哥不忘抽水，仲話要開拍惡搞版星戰《The Empire Strikes Back XXX》，如果有留意四仔嘅，都知道大導喺2012年已惡搞過一鑊《Star Wars XXX》，但今次佢冇搵片廠投資，亦唔係用自己錢，反而喺Indiegogo向網友籌旗，希望集資500,000美元就可以開拍，結果上個月底大限到，只籌得109,485美元，即係一半都冇，宣布失敗！咪話細佬馬後炮，早喺大哥宣布籌旗時，都批死佢一定唔達標，之不過Axel Braun抱住過去惡搞超級英雄四仔大賣特賣，信心滿瀉，以為四仔迷一定好期待，必定瞓身撐佢，結果咪衰喺自己手上囉！本來唔籌旗搵老細投資或者四仔都會成事，依家Axel自己摑自己一巴，睇怕下次要搵老細埋班，佢都唔敢再咁大聲囉！衰咗係事實，但大導唔係浪得虛名，點可以承認自己失手呢？所以佢事後接受傳媒訪問，一腳將個波射畀四仔迷：「如果大家真係咁想我拍嘅，我當然會拍，而事實可見粉絲都唔希望呢套大作出現。」將責任卸得一乾二淨，係咪勁先？未完（口架），大導仲要借勢踩多腳話：「雖然計劃未達標，但我要衷心多謝有份捐獻嘅網友，即使唔成功，我都叫努力過，亦從呢個計劃睇到，全球四仔迷都唔願意付出，只想享受免費色情，盜版嘅威力實在太大喇！」巴打學到嘢未呢？