外國球迷一向狂熱，最近德國甲組球隊漢諾威正面臨降班危機，當地一間妓院決定喺球隊進行最後一場聯賽之日搞優惠，以示支持。一間侍應全部都係性感美女嘅餐廳最近喺日本舉行一場選拔賽，從當地分店選出佳麗再挑戰集團嘅全球選美大賽。番茄係一種有益嘅蔬果，原來對男士仲有特別好處。
相信今年好多英超球迷都大跌眼鏡，因為當中幾隊傳統班霸都失去往日風采，最明顯就係紅魔鬼曼聯，喺聯賽榜三甲不入，令紅魔迷非常失望。小弟我就比較鍾意睇德甲，我嘅愛隊拜仁慕尼黑如無意外又再奪得聯賽冠軍。之不過，有人贏就當然有人會輸，漢諾威暫時喺聯賽榜排第尾，喺餘下3場聯賽唔單止要贏，仲要祈望對上兩隊輸波至有機會留班，睇嚟呢個機會都相當之微。
一眾漢諾威粉絲非常傷感，位於德國漢諾威嘅知名妓院FKK Villa則全力向球隊表示支持，更喺5月14日，亦即漢諾威上演今季最後一場聯賽之日搞派對，一來為季尾慶祝，二來為今季球隊帶來高潮。據悉當日入場男士每位收費96歐元（約HK$852），除咗香檳之外，所有飲品任飲，仲可以享受一次15分鐘妓女服務。我諗妓院中嘅性工作者應該要有心理準備，因為班球迷好可能精神處於極為憤怒嘅狀態，因為呢場比賽係對班霸拜仁，想贏都好難。
香港表面上好開放，但實際上就保守得好緊要，例如電視節目有少少暴露場面，即刻收到投訴。早前有間美國知名以性感女侍應及運動為主題嘅餐廳有意喺香港落戶，可能就係因為怕被人反對而取消計劃喇。之不過，喺日本、美國等地，呢間餐廳就繼續穩定發展，最近日本方面更加順利完成「Miss HOOTERS 日本代表選拔賽」。呢個選拔賽喺日本多間分店當中，挑選出20位星級女侍應參加，經過一輪考驗同投票之後，來自銀座分店嘅AKI奪得冠軍，將會帶領另外4名佳麗，齊齊殺入將於7月喺美國賭城舉行嘅「Miss HOOTERS 世界大會」，角逐最終殊榮。
男人老狗應該大杯酒大塊肉咁先至有男子氣概，之不過年紀漸大，消化能力減弱，暴飲暴飲好容易會帶來健康問題，所以都係大杯水大啖菜喇！咁食乜菜好？男士們最好就係多食番茄啦！唔少醫學研究都發現，番茄中嘅番茄紅素幫助降低出現前列腺問題。大家可能會話：「前列腺問題通常都出現於中老年人身上，我哋咁後生咁精壯唔使怕啦。」咁又唔係喇！如果大家將要進行傳宗接代嘅偉大任務，都要常食番茄。英國謝菲爾德大學搵來60位年齡介乎18至30歲嘅男士協助，進行一個長達3個月嘅研究，結果發現有定期定量吸收番茄紅素嘅男生，其精子質素都比冇吸收番茄紅素嘅男生更高，成熟精子數量亦同樣較高，想做爸爸嘅男士，食多啲番茄啦！
撰文：賢