每件事情做得多都會覺得悶，加拿大人唔知係咪因為正常床戰進行得多，所以鍾意另類玩法呢？吸煙危害健康，更會影響男人嘅性機能健康。女仔鍾意乾淨，亦喜歡男仔乾淨，但係過分潔癖就會令人抗拒。
小弟有唔少親友移居加拿大，佢哋久不久都會返港探訪小弟一家，問到生活成點，佢哋都話當地娛樂唔多，一定冇香港咁多姿多采，令小弟深感香港幾好都有，好彩當初冇跟埋佢哋一齊移民，更覺得加國生活一定好苦悶。生活得悶固然會令民心思變啦！最近一個喺加國進行嘅性生活相關調查，就顯示出當地男女好希望喺性生活當中尋求新意，是次調查訪問咗1,040位成年男女，發現最多人希望滿足自己嘅偷窺癖好，35%人想喺現場睇住人哋上床，其次就有26%想同不同嘅物件「摩擦」一番，另外，仲有19%話想體驗一下被愉虐嘅感覺，但係當中有實行嘅又有幾多呢？有33%受訪者話自己玩過上述至少一種！照咁睇嚟加國男女都幾勇於尋找另類快感喎！
小弟身邊有好多朋友都有吸煙習慣，不過以後見到佢哋，我一定會同佢哋講述一個研究報告，相信會成為佢哋戒煙嘅一大動力。早前一個來自英國嘅研究發現，吸煙除咗危害健康，會引致心血管疾病、肺病等，更加會影響到男人最重視嘅性能力！研究搵嚟4,700名男士協助，平均年齡47歲，每日都會吸20支煙以上，煙癮都算幾深，咁就弊傢伙喇！因為研究發現佢哋患上勃起功能障礙嘅機會率，比起非吸煙男士高出6成！醫生Samantha Evans就話煙草所含嘅有害物會令血管縮窄，增加心臟病風險之餘，影響性能力嘅地方在於血管窄咗，換言之流去小弟弟嘅血液亦會減少，想喺房事當中有充足嘅膨脹度同硬度就難啲喇！各位猛男唔好等喇！為自己同伴侶嘅性福着想，即刻戒煙喇！
由細到大，師長都教我哋要保持整潔，而近年病毒肆虐就更加警惕我哋幾時都要保持乾乾淨淨，要防止疾病傳播害人又害己。但係太過乾淨的話又唔係好事，好似唔少父母過分保護仔女，乜都要處於無菌狀態，咁就搞到仔女因為少接觸細菌而抵抗力下降喇。事實上，男人有潔癖，女仔唔多鍾意。日本一個調查訪問咗過百名女仔，顯示出男仔有三種潔癖令佢哋難以接受，排第三位係男方拒絕食火鍋時可供同枱朋友一齊享用嘅菜式；第二位就係唔敢去浸溫泉又或者去公眾澡堂，而最討厭係男仔連女方親手煮嘅菜式同飯盒都有所顧忌。有冇搞錯呀？連愛心飯盒都嫌唔衞生，咁就抵佢哋畀女仔嫌棄啦！
撰文：賢