唔少人總會覺得模特兒只係得外表，冇咩內涵，咁就大錯特錯啦！好似內地嫩模兜豆靚除咗拍攝性感寫真，仲係一位遊戲設計師兼插畫家，可謂多才多藝呀！
今年23歲嚟自四川成都嘅兜豆靚，當然唔係姓兜啦！真名叫嚴亮，英文名Youlina，於上年出道成為模特兒。佢自稱係個熱愛歌唱、跳舞、攝影兼性格開朗又爽直嘅辣妹，究竟佢係咪辣妹就要接觸過至知，但好肯定嘅係佢身材非常火辣，三圍36-26-35，玲瓏浮凸嘅胴體，輕易吸引大家嘅目光。而佢喺處女寫真作品中，盡情展現誘人美態，配合埋標致嘅五官，成功上位。走紅後，佢先後喺多本時裝及汽車雜誌上亮相，更成為商品代言人，同時佢亦代理化妝產品，實行喺商界大展拳腳。
雖然阿妹八足咁多爪，但係佢仍然冇放棄模特兒工作，早前佢去到泰國拍攝寫真，仲自拍咗性感迷人嘅短片放上網畀粉絲欣賞，跟住佢又去到冰天雪地嘅地方進行另一個寫真攝影，可見佢工作行程排得密密麻麻，亦足證佢真係好鍾意做模特兒。
唔講唔知，原來阿妹係西南交通大學影視動畫系畢業嘅高材生，喺投身模特兒界之前，佢喺一間遊戲公司擔任插畫師及設計師，曾先後喺多個產品設計比賽、插圖大賽、藝術比賽、動漫大賽等獲得獎項。佢表示為咗獲得更多創作靈感，閒時會四圍去攝影，捕捉唔同嘅影像，將遇見嘅每樣事物喺腦海中變成一幅畫。佢又話自己好鍾意胡思亂想，只有畫畫嘅時候，先至可以令心情平靜，故此佢對繪畫有如此嘅熱情。
現在雖然佢每日工作相當繁重，但係佢仍然堅持繪畫同攝影，皆因兩者係推動佢向前嘅原動力。問到佢未來會否喺插畫界發展，佢就話一直以嚟都冇放低過繪畫嘅工作，仲好快會推出處女繪本作品添。試問大家見到呢位身材火辣，喺寫真中又表現得極性感嘅模特兒，又點會想像得到佢竟然係個如此多才多藝嘅創作家呢？
簡介：兜豆靚呢個藝名的確有啲騎呢，不過佢嘅外形確係迷人，擁有一副玲瓏浮凸嘅身材，試問有邊個男士唔會對佢暈晒大浪吖？想欣賞阿妹嘅靚相，梗係唔可以錯過佢嘅微博啦！
網址：www.weibo.com/doudouliangyl?is_hot=1
出生地：四川成都
身高：168cm
三圍：36、26、35
撰文：魂