咪以為女仔淨係鍾意高大靚仔，事實上有研究發現男人大愛無私一樣可以吸引到女仔。好多人年紀愈大就愈早起身，的而且確，不同年齡層有其不同生理時鐘，咁唔同年紀又有冇適當嘅上床時間呢？雖然話男人好色，但係好多男人都會自重身份而唔會飛擒大咬，除非聞到女人身上嘅香氣，即時慾火焚身。
唔少人都誤解咗我哋男人，以為只會欣賞女仔嘅外表，事實上好多關係長久嘅夫婦都話畀大家知，老婆唔使好靚，只要持家有道就足夠。同樣道理，可能我哋男人亦誤解咗女人，以為佢哋只會對高大靚仔有型嘅男人傾心，事實上的確並非如此。一份有關進化心理學嘅研究發現男人無私奉獻嘅行為，絕對有助佢哋提升對女仔嘅吸引力。研究指出女仔比較鍾意有風度但唔多靚仔嘅男人，多於靚仔而唔好相處嘅男人。另外，無私奉獻嘅暖男比靚仔更具吸引力，原因係女仔認為佢哋適合做長久伴侶，上床亦唔會一味掛住自我享受忽略女方感受。負責研究嘅Daniel Farrelly總結話雖然女仔都會發生一夜情，但係佢哋能夠分得清楚邊一種係可以付託終身嘅男人，所以有愛心嘅男人始終都係有優勢，各位自問唔靚仔嘅朋友不妨多做義工同善事增加吸引力喇！
年紀大咗真係唔捱得，以前同班兄弟蒲到凌晨2、3點依然精神奕奕，家陣凌晨12點就猛咁放蚊，上床蒙頭大睡。其實不同年齡不但會影響到我哋嘅生活習慣同生理時鐘，亦會影響到我哋發揮床上戰鬥力嘅最佳時間。牛津大學睡眠與晝夜神經科學研究所嘅Paul Kelley博士就為此進行過一系列研究，繼而發現到不同年齡嘅最佳做愛時間，20來歲嘅最佳時間係下午3點，年輕人其實無時無刻都適合做愛，但係一般嚟講下午3點係年輕人體能嘅最佳時刻；30來歲就以朝早8點最佳，原因係呢個時候情緒容易被挑起；40來歲最佳上床時間為晚上10點，因為做完愛成個人都輕鬆晒可以幫助入睡；50來歲的話，晚上10點就最好喇！
小弟患有鼻敏感，同時對於香味相當敏感，每次出街聞到一陣狐味必然作嘔，但聞到女人身上散發出嘅攝人香味則會神魂顛倒，唔單只咁，每次同女仔約會，如果對方身上有香水味的話，我都會對佢印象特別深刻。事實上，香味對於生物嘅生態相當重要，對於人類亦都一樣，日本一個化妝品品牌進行過相關調查，就證明到呢一點喇！該品牌訪問咗100名男士以研究一下要令男性動情有咩要素，結果發現豐滿嘅胸部、婀娜嘅纖腰都係其次，原來最重要係香味！當中唔少男士表示，每次聞到誘人嘅香味腦海中都會聯想起女性身上嘅溫香軟肉，以及接觸柔軟肉哋嘅觸感，令佢哋動情，甚至係慾火焚身！
撰文：賢