以前啲夜場真係幾惡，玩家入場後若然覺得唔啱玩想走人，輕則畀人用幾十個粗口字鬧你，重則要你留低一定數額嘅銀両先至可以離開。不過，今時今日咁嘅服務態度就唔得喇，不但要搞噱頭吸引玩家捧場，仲要諗計點樣可以提升服務質素，所以話靠惡已經Out喇！
上海有得睇脫衣舞？係咪真呀？喺上海松江區一帶有幾間專門表演脫衣舞嘅舞廳，佢哋最少營業咗一年，有啲甚至超過5年。雖然嚟舞廳幫襯嘅客人以中老年嘅男士為主，但咪以為佢哋冇消費力同市場唔大，由於入場票價唔算貴，每晚吸引過百位客人入場。至於艷舞女郎嘅收入亦唔錯，每位囡囡每場收入為200至300人民幣，如果表演有色情元素嘅話，仲可以多50至100人民幣收入添！不過話說回來，點解佢哋每晚打正旗號表演艷舞，仍然可以經營咁耐，一直冇被有關當局取締呢？原來佢哋採用咗兩種方法避風頭，一種就係經常轉換表演場地，等有關方面難以偵查，另一種則係收風，當收到風有關當局嚟掃場時，佢哋先一步遷移。只係上得山多終遇虎，喺上個月中有關當局成功取締咗4間舞廳，並處以相關罰則。
喺現今嘅網絡年代，網上嘅黃業資訊相當多，而玩家亦養成咗先喺網上睇辦，然後再行動嘅習慣，台灣嘅夜遊界亦是如此。按正途嘅做法，業界人士會將旗下囡囡嘅「肉照」擺上網，讓有興趣嘅玩家睇辦，睇啱後就進行交易。由於睇相嗰Part好重要，於是有業界人士為咗吸引玩家，竟然用上一啲知名索女嘅相片嚟冒充囡囡，台灣一位人氣女主播就係其中一位受害者。呢位女主播得悉有人用佢張相嚟招嫖，即刻嬲爆並喺網上發布公告，譴責呢種咁唔道德同毀壞他人名譽嘅行為，並且喺手機聊天軟件中，搵到用佢張相嘅業界人士對質。起初嗰位業者唔知對方身份，拍心口稱囡囡跟相中人嘅分別唔會太大，點知當佢知道對方原來係相中人後，竟反過嚟指摘對方：「你係個女人，湊乜嘢熱鬧！」「借張相嚟用吓使死咩！」最過分嘅就係對方堅持唔刪相，真係離晒譜！
如果有人話請你食貓飯，相信冇邊個會大大聲話好兼講聲多謝，點解？因為貓食嘅嘢家陣請你食，唔扯火至出奇啦！雖然同樣係叫做貓飯，但日本嘅「貓飯」卻係個極之深入民心嘅平民食品，做法係喺白飯加上鰹魚乾，並加上少許豉油就完成，由於佢夠平又夠飽肚關係，故此成為平民食品，並喺日本各地演化出唔同嘅食法，好似關西人就鍾意加上味噌湯，並稱做「汁泡貓飯」（即係味噌湯泡貓飯咁解）。不過大家去到關西嘅風俗店時，一聽到風俗娘講汁泡貓飯時，千祈唔好懶醒咁以為佢請你食飯，原來喺風俗店中，「汁泡貓飯」係解做顏面發射嘅意思。大家又唔好怪自己見多識少，因為唔好話我哋呢啲唔識日文嘅人，就算係關東人初到關西嘅風俗店時，都一樣誤會「汁泡貓飯」嘅意思。
撰文：魂