調查發現美國女士對於男人有一種偏好，就係鍾意有古典味又夠成熟，閣下到底有冇呢兩種特質呢？男人睇鹹網同玩遊戲機都係為咗「打機」，但係最近有一款遊戲推出之後，居然有能力令知名鹹網嘅瀏覽率瞬間下降，究竟係咩遊戲咁厲害呢？講到出軌，男女都會，日本人妻又鍾意同邊種男人發生不倫之戀呢？
香港女仔鍾意邊類型男仔呢？我相信只要有一個條件就可以縱橫情場，就係有錢喇！至於以同樣問題問英國女仔，又會得到咩答案呢？印象當中，外國女仔好多都性格獨立外向，唔多需要其他人照顧，至少唔會好似港女咁成日要求男伴管接送，仲要幫手做各樣雜務。最近一個英國交友網站訪問咗3,211名當地女性，當中有80%表示鍾情成熟男士，79%希望男伴帶點古典風雅味道。另外，有69%女士鍾意對女友照顧周到兼保護有加嘅男伴。從以上結果睇嚟，各位男士想追求佢哋不妨打扮得成熟啲啦！
最近小弟聽到一位長輩回顧其風流史，佢話當年做過水電工，唔少艷事都係喺上門幫少婦同單身女仔工作而發生。坊間亦有流傳，水電工同好多家庭主婦關係密切，咁到底女士們出軌嘅對象又係咪水電工呢？喺香港就唔知，但喺日本相信水電工三甲不入。日本一個調查訪問咗105位女士，而佢哋全部都係任職經理級，問及佢哋最希望同邊類型男人發生出軌行為，結果排名第三係公務員，原因係佢哋嘅職業顯得身份比較尊貴，對女性有一定吸引力；排名第二就係實業家，其豐厚身家可以令女士有更多高級享受，唔鍾意佢哋就假啦！之不過，有錢都未必贏晒，因為排頭位居然係普通嘅白領階級，主要原因就係方便同容易上釣，咁又係，受訪者都係經理級，威逼利誘下屬出軌絕對係手到拿來，取易不取難原來都適用於呢一方面。
早幾年日本311大地震，搞到福島出現核災，繼而令中港爆發「盲搶鹽」，雖然鹽唔可以抗輻射，但係輻射就可以抗鹹網喇。早前推出咗遊戲迷期待已久嘅角色扮演遊戲大作《Fallout 4》，故事講述玩家扮演嘅角色沉睡二百年之後醒番，發覺世界已經被核災摧毀成廢墟，故要喺呢位充滿輻射同怪物嘅環境求生。由於遊戲係知名系列亦製作用心，好多遊戲迷都爭相購買，遊戲推出首日就已經出售超過1,200萬隻！正因為咁多人玩，知名成人視頻網站Pornhub就表示網站平均每日有6,000萬人瀏覽，但係遊戲推出當日早上瀏覽量出現約10%嘅跌幅！中午開始回穩，但係6點之後又再下跌，負責人就話睇鹹網者好多都係機迷，故相信《Fallout 4》絕對係令鹹網瀏覽量下跌嘅主因。
撰文：賢