每件事情都要做得適量，好似上床咁，好多男人都希望晚晚有不同女伴激戰三百回合，但係專家話要保持長久關係，每周一次就已經足夠。日本人工作繁忙程度不比香港人低，唔知係咪因為太忙，超過半數受訪者表示同伴侶進入無性生活狀態。
鮑魚雖然矜貴好食，但係如果每日三餐都要你食，仲要連續食足一個月，唔好話難消化，食到最尾一日可能連鮑魚係咩味都分唔到，有專家就話上床亦係一樣。加拿大多倫多大學密西沙加分校嘅Amy Muise博士花咗14年時間，搵到2,400對夫妻，研究佢哋每周房事次數、快樂指數以及關係維持嘅長久度。綜合多年來嘅調查結果之後，博士發現每周進行房事一次嘅夫妻感情最好，關係維持最長久。雖然，數據上顯示夫妻之間房事次數愈頻密，快樂指數愈高，不過，博士則建議每周做一次最好，原因係唔會為體力帶來負擔，同時唔使驚因為房事頻密而影響表現，冇咁大壓力自然令夫妻喺床上表現更加出色，對於維持一段長久關係亦相當有幫助。
最近內地終於將推出多年嘅一孩政策放寬，睇嚟未來內地人口有望急劇增加，如果大家係做開兒童用品生意，北望神州相信一定前途。另一邊廂，日本嘅生育率可能創新低喎，唔係因為受政策影響，而係日本嘅夫妻唔肯做愛。日本一個傳媒訪問咗73對夫妻，問及佢哋有關性生活嘅狀態，居然有51.4%答話近半年冇做愛，其次係有13.9%答平均每個月只做一至兩次。至於呢班夫妻喺幾時開始進入無性生活狀態呢？最多人答話結婚之後一至三年就開始漸漸減少做愛。而專家就提出建議，表示夫妻相處之道貴乎坦誠，想做就要提出，仲提議夫妻可以食多少少助性食物例如牛油果、朱古力等，以提升性趣。
撰文：賢