睇四仔已經唔再係男人嘅專利，家陣睇四仔嘅女性愈來愈多，佢哋仲話睇完有所得着添！想增添閨房之樂，有人從衣着以及增強體力入手，其實布置閨房營造氣氛一樣有幫助。男人講嘢粗聲粗氣認為有男人味，但係有研究指出男人說話愈大聲睾丸愈細。
隨住男女平等嘅訊息日漸普及，以往只得男士擔任嘅職業都開始由女士代替，例如足球界咁，就有女球證。另一方面，欣賞四仔嘅一向以男士為絕大多數，之不過最近就有美國媒體發現，睇四仔嘅女性愈來愈多。該媒體進行過一項調查，透過網上問卷訪問咗好多女性，得出嘅結果都幾令人感到驚訝同值得四仔業界以及男士們參考。問到有關睇四仔嘅次數，有31%女士回答每星期都會睇，30%就表示每個月都睇幾次，而佢哋睇四仔嘅方法，有62%都會用智能手機。至於點解佢哋享受睇四仔呢？有73%認為睇完後能夠容易得到高潮，呢一點男士們要記住喇！下次同伴侶上床前不妨排排坐睇部四仔先。另外，睇四仔仲令女士們有咩得着呢？有51%表示睇完之後令佢哋更加了解性愛，29%話睇完令佢哋覺得自己更加性感添！
覺得生活枯燥乏味，唔係因為世界無新事，而係自己唔識得發掘有趣事。同樣地，好多夫妻都表示性生活乏味，其實係因為大家唔肯花心思燃起激情。咁又可以點樣燃燒法呢？飲多兩杯等大家醉醉哋先埋牙？定食好多助性食物，例如生蠔呢？心理學家Annie Gurton就表示房間除咗係用嚟瞓覺，同性生活有莫大關係，要增強閨房之樂大可以從布置房間做起。Annie話燭光晚餐夠晒浪漫，而房間只係亮起燭光一樣可以令房內充滿浪漫同神秘嘅氣氛，仲可以產生一種如同幫襯夜總會嘅效果，相信大家都試過喺黑媽媽嘅環境之下覺得女仔好索，但係一開燈就嚇一跳嘅經歷啦，點蠟燭就有呢種效果喇！另一個方法就係用幾塊帶有鮮艷色彩例如紅色嘅布掛喺牆上，視覺上嘅刺激有助增加熱情指數。
小弟我一向文靜，講說話都斯斯文文，是故相當怕，甚至討厭其他人大大聲咁講嘢，一聽到真係心都煩埋，我仲會心中暗罵佢哋聲大大冇貨賣。我咁樣嘅暗罵其實唔係冇根據，事實證明有好多人的確得把聲而冇乜料到，而一個生物研究亦有從其他靈長類動物身上有相同發現。一個叫做Jacob Dunn嘅研究員為144隻吼猴進行研究，發現佢哋當中叫得愈大聲嘅一群，睾丸體積比叫得細聲嘅一群細小，點解會咁呢？原因好簡單，因為每種動物其實能量有限，好似呢種吼猴咁，叫得大聲因為聲帶用咗好多養分發育，搞到睾丸就相對地少咗養分，睾丸生得細，精子嘅質量都會差好多。Jacob Dunn話人類都係靈長類動物，呢個研究結果套用喺人類身上相信亦有一定參考價值。
撰文：賢