想睇比堅尼女郎唔一定要去海灘，去睇樓一樣有得你睇，仲任你點睇都得。話說早前河南駐馬店市有個國際廣場舉行盛大嘅睇樓會，可能發展商眼見一般嘅播音樂同任食自助餐，喺家陣內地樓市嘅寒冬期未必可以吸引到大家嘅注目，於是搵嚟一眾中外索女化身成比堅尼女郎招待員，陪買家去睇屋。呢單料一出自然有唔少異議，最多人講嘅梗係指責呢個發展商出招太低俗，又話若然老婆同行嘅話，都唔知買唔買云云。不過呢頭有人鬧，嗰頭亦有人撐，認為呢招有噱頭又有諗頭，而有啲眉精眼企嘅網民就道破呢個已經唔係新招，正所謂橋唔怕舊，最緊要受，邊個話橋唔可以一用再用呢？須知道不論低俗定老婆睇住都係假，最重要係大家喺談論呢件事嘅過程中，已經幫呢個樓盤進行宣傳。話時話，唔知呢種睇樓團仲有冇其他地方會搞呢？等有興趣嘅人就算唔睇樓，都可以同班女郎嚟個Selfie都好吖！