咪以為男性成漫家所畫嘅十八禁漫畫先至好睇同夠鹹味，其實日本亦有唔少女性成漫家，佢哋唔單止畫重口味嘅題材出色，輕鬆少鹽嘅作品更係相當拿手，好似東鐵神就係其中一位。呢位重鹹或輕鹽題材都難佢唔到嘅漫畫家，喺作品《戀愛檸檬》中就展現出其創作力。
有別於其他女性漫畫家，東鐵神一開始就以成漫家嘅身份出道，畫風亦同其他成人漫畫創作嘅女性漫畫家有啲分別，就係唔會為咗討好男讀者，而將畫風偏向粗線條，反而以輕快同笑點多為重點，每個畫面中更滲透出女性漫畫嘅風格。可能有人會覺得明明係成人漫畫，如果似女性漫畫會唔會唔係咁好呢？起初連佢自己都有疑慮，只係喺2001年推出首本連載成人漫畫《天使的耳語 惡魔的Kiss》後，大獲好評，令佢信心十足，翌年推出另一本作品《Double Birthday》，更成為其代表作之一。之後，佢每年所推出嘅漫畫，好似《彼女情人》、《粉紅色的穴》、《桃色保健室》、《不要公主！》、《微熱開關》等，更係將佢嘅人氣不斷推高。及至今時今日，佢同時兼任成人漫畫月刊《COMIC快樂天》、《Young Champion》同《Men's YOUNG》嘅漫畫家，從其作品數量之多及人氣之高嚟睇，足證佢實力強勁。
今次介紹呢本《戀愛檸檬》，就係佢喺上年8月推出兩部曲作品嘅第一集。如果有睇過日本著名漫畫家桂正和嘅作品《電影少女》嘅話，會發現《戀愛檸檬》嘅故事設定同前者差唔多，同樣以輕鬆搞笑嘅愛情故事為背景，而分別之處在於從VHS走出嚟嘅電影少女，變咗做吹氣公仔。故事講述西城珠樹患有一種古怪嘅疾病，就係如果佢畀女人掂過嘅話，就會全身出現嚴重過敏。佢之所以有咁嘅情況，據聞係同佢青梅竹馬女性朋友真木小春有關。由於呢個原因，令佢對女人一啲興趣都冇，反而鍾情ACG產品，尤其係一個叫檸檬嘅遊戲角色更係佢至愛。有日佢收到一個包裹，一拆開就見到個吹氣公仔，原來係佢家姐驚佢生理唔平衡，於是寄個吹氣公仔畀佢，提醒佢快啲搵個女朋友。點知到咗半夜，個吹氣公仔竟變身成檸檬，不但稱呼珠樹做主人，仲自願成為性奴。及後，珠樹得悉檸檬可憐嘅身世後，決定畀佢留喺屋企暫住，但卻要面對對方嘅百般挑逗，搞到佢好煩惱！第二集亦即結局篇，已經喺今年3月推出，想知道珠樹同檸檬嘅愛情故事會發展成點，就記得入手喇！
撰文：魂