男女關係有好多種，而一夜情就係其中之一，呢種純粹肉體上嘅關係，至今仍有唔少人認為傷風敗俗。不過澳洲《每日電訊報》就進行過一個針對澳洲女性關於一夜情嘅調查，結果發現受訪者中，竟有七成人表示曾經有過一夜情，更僅得一成七人對此感到後悔。呢種純粹肉體上嘅關係，究竟係點樣嘅呢？美國脫星Alexis Adams有佢一番見解。
Q：一夜情呢種男女關係向來備受爭議，覺得純粹肉體上嘅關係傷風敗俗，唔知你又點睇呢？
Alexis：我覺得大家喺批評之前，應該先從人哋嘅角度去睇，點解佢會選擇以呢種方式，嚟解決肉體上嘅需要呢？點解佢唔正正經經搵個男友，跟住結婚後再同對方上床呢？如果明白到呢點，我相信就算佢哋仍然唔接受呢種行為，卻起碼明白他人嘅諗法。如果問我，我既唔反對一夜情，同時亦唔反對傳統嘅兩性觀念，皆因我覺得每個人既然天生外形、身體及思想等都唔同，點解諗法一定要個個都一樣呢？既然每個人都唔同，性愛觀唔同亦冇問題，性愛係個人嘅感覺，最重要係佢覺得滿足，同埋要為自己嘅行為負起責任，而喺咁嘅情況下，一夜情呢種關係我個人認為絕無問題。
Q：你先前講到要從一夜情人士嘅角度去睇呢種關係，咁你覺得佢哋點解會咁做，同埋當中嘅心態係乜呢？
Alexis：其實我亦試過一夜情，故此可以分享當中嘅諗法。好多人以為一夜情嘅目的只係單純洩慾，只係呢種睇法相當膚淺。我之所以有一夜情，唔係單純為咗追求性快感，而係因為唔係好相信男女關係，可以保持到咁長久，亦唔覺得性愛一定要同個識咗好耐嘅男人先至可以發生。乜嘢叫做有深入嘅了解？乜嘢叫做大家都認同咗對方？呢個問題冇標準嘅答案。就算你以為你已經搵到當中嘅答案，世事嘅嘢又點可以話得埋，而你又點知對方嘅諗法係咪同你一樣呢？既然係咁，點解我唔能夠單純地從自己嘅感覺出發，只要滿足到自己又唔使擔心受到傷害，呢種關係自然係一種最好嘅選擇。不過我要重申，就係喺發生呢種關係前，先要問自己能否承擔當中嘅後果。
撰文：魂