家陣玩樂唔單止講求視同聽咁簡單，仲要有埋嗅、味同觸覺感受，先至係完美嘅體驗，因此不少網民熱烈要求韓國網絡女神現身，等大家睇吓佢嘅真身係咪咁索。此外，荷蘭有設計師宣布推出一件測謊衣服，一講大話件衫就會變透明。不過咁都唔算爆，試問大家敢唔敢一嘗用鹿精混合而成嘅黑啤呢？
唔知大家仲記唔記得早幾年前，香港曾經展出過由荷蘭著名設計師Daan Roosegaarde所設計嘅測謊衣呢？呢個名為「Intimacy」系列嘅測謊衣有黑同白兩種顏色以供選擇，而佢最特別之處，在於衫中內置嘅智慧線圈，會感測穿着者嘅心跳同埋呼吸頻率。當穿着者嘅心跳同呼吸頻率愈快，件衫就會變得愈嚟愈透明，最後就會全身裸露於人前。按設計師嘅原意，目的係為咗可加強人與人之間嘅溝通，等大家少啲謊言存在，只係其後卻發現原來佢仲具有測謊嘅功能。正當大家以為呢件衫不過係概念產物之際，該公司宣布預計明年情人節前將可推出市場，唔知各位情侶會唔會買番件送畀拖友，測試一下對方嘅真心呢？
呢個世界有種啤酒，就算好酒如劉伶都未必敢試，事關佢係以鹿精混合黑啤而成嘅啤酒。大家並冇睇錯亦冇聽錯，佢的確係從隻好生猛嘅公鹿身上榨取精液再混合黑啤溝出嚟呀！位於新西蘭中部城市威靈頓嘅酒吧Green Man Pub，酒吧負責人Steve Drummond眼見2011年用過「類似」動物嘅精液，所製成嘅雞尾酒獲得空前成功，於是佢喺今年再添搞作，決定推出名為Stag Semen Stout嘅鹿精黑啤。唔好問佢點解會諗到用鹿精，只係知道佢哋搵到嘅第一隻公鹿，搞極都取唔到精華，於是換咗第二隻叫做Lagoon嘅公鹿後，終於成功將精華入手。據釀酒師Kerry Gray講，起初大家都有啲抗拒，結果試完後讚不絕口並決定將佢投產。
索女係男人都鍾意，而仲要有激凸身材嘅索女，更係男人心目中嘅女神！話說台灣早前有網民喺網上，上載咗一輯比堅尼辣妹相，兩位索女不但個樣甜得嚟又勁索，身材更係相當有睇頭，名副其實係女神下凡。唔少網民睇完相後，就強烈要求女神快啲現身，只係呢兩位索女係邊個嚟呢？原來佢哋係對嚟自南韓嘅孖生姊妹Lee Soo Bin（譯音：李秀彬）同Lee Hee Kyung（譯音：李熙瓊）。從事平面時裝模特兒，喺1990年5月23日出世嘅佢哋，早喺幾年前憑住出眾嘅外形，以及一啲都唔科學嘅超火辣身材，成為網上紅人，而喺南韓更係有相當高人氣。呢次佢哋又再被摷番出嚟，只係證明佢哋嘅靚女相幾時睇都咁正。
撰文：魂