白石麻衣 白色隱乳

所謂耳聽三分假,眼看未為真,好多男士外出溝女嘅時候都分別唔出邊個女仔身材較好,上圍較大,搞到上到床,甚至係拍埋拖至知對方上圍不似預期。老實講,好多女仔雖然瘦瘦哋,但係上圍亦甚有斤両,好似白石麻衣咁就係近年至被人發現咁好身材喇。

純白綺麗

日本樂壇近年被一大班女仔佔領,佢哋就係人氣長期高企嘅AKB48,以及同一系列嘅SKE48喇。除咗佢哋,同樣人多勢眾,成員個個都係青春美少女嘅乃木坂46,亦憑出色表演以及迷人嘅青春魅力,成功俘虜一班樂迷嘅心,成功喺兩個48嘅強勢發展之下爭取到強勁人氣同支持。同乜乜48一樣,乃木坂46有其標誌性人物,今日為大家介紹嘅白石麻衣就係其中之一。今年21歲嘅麻衣相比其他成員,生得比較成熟,呢種成熟只係令佢面上嘅姊系氣息稍重而已,配合其清麗脫俗嘅氣質加上標致五官,令佢好似為各位男士年少時帶來視覺同思想衝擊嘅女神一樣無可取代。白石麻衣身材應幼則幼,應大嘅地方則甚有斤両,一次拍攝寫真嘅時候佢嘅緊身衫就將其胸部出賣,大家都因為見到麻衣嘅上圍而感到驚訝,仲稱佢為乃木坂46之白色隱乳,意思即係阿妹禾稈冚珍珠。

孝心感人

白石麻衣細細個就有好多理想,小學嘅時候因為鍾意食糕點,於是夢想長大之後開一間糕點舖;讀中學開始睇時裝雜誌就一心諗住做模特兒,呢一點今時今日算係已經完成夢想,因為麻衣樣貌身材俱佳,經常獲雜誌請佢拍寫真做封面,喺報章雜誌嘅曝光率同乃木坂46嘅超人氣隊友生駒里奈可謂不分上下。讀高中,麻衣亦曾經諗過做看護同廚師,不過發覺自己漸漸對音樂產生濃厚興趣,就以Speed以及Perfume等組合作為奮鬥目標。2011年麻衣成功通過面試,成為乃木坂46嘅第一代成員,由於人氣長期高企,至今依然係組合嘅中流砥柱。上年開始白石麻衣除咗唱歌,仲加強喺寫真界嘅發展,上年推出嘅寫真集《純潔的大人》初版錄得超過十萬本嘅理想銷量,可見大家對麻衣幾咁支持。正如某立會議員所講,我哋香港人能夠飲到東江水要識得感恩,麻衣有今時今日都好感謝父母嘅養育同支持,最近乃木坂46拍咗部紀錄電影叫做《忘記悲傷的方法》,記錄隊員出道以來嘅苦與樂,麻衣就喺記招表示對父母嘅孝行做得唔足夠,希望未來可以有更多孝順父母嘅機會,講講吓仲喊到收唔到聲添!有咁嘅心意其實已經足夠感動父母喇。

好料推介:

呢個博客係乃木坂46為白石麻衣而設,以記載佢同隊友嘅工作為主,個人生活點滴比較少,相信到麻衣從隊中畢業先會有一個能夠透露更多個人生活嘅博客喇。

網址:http://blog.nogizaka46.com/mai.shiraishi/

白石麻衣Profile

年齡:21歲

身高:5呎4吋

三圍:32-24-33

撰文:賢