根據交友網站進行嘅調查發現，大多數女性唔鍾意開跑車嘅男士，認為佢哋不過為咗炫富、個性傲慢同埋鍾意開快車，反而偏愛駕駛較具實用性汽車嘅男車主，而呢個發現同唔少男士嘅觀念恰好相反。正所謂香車配美人，查實女性又點睇跑車型男呢？美國人氣脫星Ash Hollywood自有佢一番見解。
Q：男人鍾意開跑車固然係為追求嗰種速度感，另一方面更希望得到女士嘅青睞，同佢哋發展更深入嘅關係，唔知你又點睇呢？
Ash：老實講，我真係對開跑車嘅男士冇乜太大嘅興趣。有人以為見到個索女，好開心咁跳上架跑車度，就係因為被名貴跑車所吸引，誤以為跑車可以獲得女性嘅歡心。不過我就唔係咁諗，嗰位女士之所以跳上跑車，並非鍾意跑車夠型，而係好多時認為開得咁貴跑車嘅男士，一定係個有錢人，唔通你以為着住高踭鞋同迷你裙，上落座位相當低嘅跑車好過癮？如果諗住憑住架跑車，就可以同女性發展更深入關係，甚至係一夜情，呢種諗法更係大錯特錯！須知道有機心女人嘅眼光，點會只係落喺架車度咁淺薄，當佢知道男士成副身家僅得架跑車，莫講話想曳曳，想拖手仔都難呀！
Q：據聞你都有架意大利跑車，唔通你想反過嚟溝仔？定係你有其他嘅用途呢？
Ash：我知你想問我乜嘢。我可以話畀你知，我係唔會喺架跑車度玩車震。因為跑車嘅內籠唔大，根本冇可能喺度曳曳，更何況張賽車櫈好難當成床，所以我絕對唔會咁樣做。反而我覺得實用啲嘅車，先至係車震嘅最好選擇。另一方面，我之所以鍾意跑車係因為我覺得喺呢個時代，跑車唔係男士嘅專利，反而覺得辣跑配索女，對男士嚟講更加有吸引力，仲可以顯示出女性嘅獨立個性，故此我特登買咗架跑車代步。當然，有時遇到心儀嘅男士，我都會用我架車載佢兜風，只係唔知係咪有啲男士嘅自尊心好強，佢哋見到我架跑車時，表面上好似冇乜所謂，慢慢就會表示不滿而希望我換過第二架普通啲嘅車。
撰文：魂