咪以為日本嘅鹹濕漫畫題材，離不開癡女、人妻或風俗孃，查實佢哋種類繁多，甚至靈異題材都有。好似呢本喺1995年7月推出，出自日本成人漫畫巨匠船堀齊晃之手嘅著名十八禁漫畫《學艷七不思議》，就係其中一個經典兼極具人氣嘅作品。
稱船堀齊晃係日本成人漫畫界嘅巨匠，確係一啲都冇誇張。事關呢位1969年11月22日於日本埼玉縣出生，並喺1992年於日本成人漫畫雙周刊《MR Magazine Happy》出道嘅漫畫家，其成人漫畫總銷售量已超過25萬冊，呢個數字對成人漫畫家嚟講確係相當驚人！有別於其他標榜情慾場面嘅成人漫畫，佢筆下嘅作品往往係以故事為先，鹽花為副，故此故事性相當強。佢嘅代表作分別有《淫色唇香》、《淫縛病疼》、《剎那 少女到達的一瞬》、《甜美生活》等等，都係令成人漫畫迷津津樂道嘅作品。隨住佢嘅畫功愈嚟愈成熟，今個月初推出嘅作品《扭曲加劇愛》更係備受大家所注目。不過講到佢真正嘅成名作，則要數呢本連載漫畫《學艷七不思議》。
不論喺當年定係今日，靈異題材嘅鹹濕漫畫相當少見，更何況成功將妖怪、恐怖同色情三種元素糅合，更係少之又少，故此雖然當時出道冇耐嘅船堀，畫功只屬一般，但憑住出色嘅故事加上鹽花場面，已足以令呢本漫畫成為經典。故事圍繞女主角角田未亞身上發展，呢位有樣有身材嘅美少女，不但係超心靈科學研究部嘅部長，私底下嘅佢更係一位靈媒師，尤其係專門驅除淫魔同解除淫術，而劇情自然從呢點展開。當中最為精彩嘅一段，莫過於佢幫人除狐妖嘅故事。話說有三個少女玩碟仙卻估唔到引狐上身，呢隻嚴重性飢渴嘅狐妖周圍同人曳曳，過程中恐怖嘅氣氛同睇恐怖片無異！最後三女搵嚟角田幫手除妖，方法就係嚟個情慾大混戰，加上超高難度嘅體位。作品推出後，先後喺2003年及2004年推出兩套OVA，足見佢幾咁有人氣。
撰文：魂