有咩工作入職條件唔難，只要肯捱十年，賺夠就可以退休唔使做呢？炒炒賣賣或者得，不過都要有本錢先有得諗！而裸模Miranda Jordan就實際得多，本錢係副靚偈，食腦兼勤力，決定喺模界奮鬥十年，之後唔打工，退休後先做番自己，家陣五年已過，已超額完成，假如佢真係捱到尾，話唔定係模界女首富添！
每日瘋狂拍寫真，逢騷必到，有工必開，目的就係為咗盡快賺夠錢上岸，年僅23歲美國妹Miranda Jordan喺五年前已經實行奮鬥十年大計，當事人更深信可以提早達標，咁就可以活出真我！五年前，尚係一名大學生主修商業管理，不過阿妹計過數，決定有錢趁嫩搵，暫時放低學業，急急腳入行做Model賺錢。
Miranda喺網站訪問中承認，佢目標並非做國際Model，只要日日有工開，任何類型都會考慮，因此由內衣到潮流服飾廣告都見到佢蹤影，你可以話佢貪錢爛做，之不過阿妹事實經已係模界小富婆。數到最搵錢，當然喺2012年開始進軍裸模界，連佢都表示意想不到，起初對裸模冇太大感覺，亦唔相信自己有市場，偏偏被Playboy網站邀請拍處女裸照，為咗錢爽快答應，事後佢話連自己都冇欣賞過，但喺其他網站經常見到有人轉載及討論，開始感覺到裸體嘅爆炸力，之後亦收到好多成人網站邀約拍寫真，而Miranda唯一底線係不拍低俗內容。
眨眼喺裸模界五年，Miranda回顧過去高呼無選擇錯，假如當日去讀書後先投身社會，今日依然係一名普通白領，而選擇投身模界，一年時間經已賺夠一般打工仔五年人工，雖然並無公開有幾多身家，但從佢社交網所見細屋搬大屋又有靚車揸，話賺得唔多都冇人信啦。
咪以為Miranda變得貪慕虛榮，忘記當日許下嘅十年承諾，事實到今日都堅持有工必開，識得理財仲精通投資，佢對傳媒話將會開設髮型屋及時裝店，引退後更會開設Model公司，由旗下Model幫自己賺錢，仲話以上生意有連帶效應，只要其中一項賺錢其他都會封蝕本門，加上自己做生招牌，佢好有信心屆時瞓喺度都發達喎！
簡介：Miranda嘅寫真上網就有得睇，反而佢嘅私生活係點先最多人想知，所以想了解阿妹平日有乜搞作，最好去Twitter，原來佢唔只開工先性感，出街去玩一樣Sexy到暈，正呀！
網址：https://twitter.com/msjxoxo
出生日期：1992年5月14日
三圍：34C-25-36
身高：5呎4吋
撰文：祖