由今期開始我哋就同大家講講今年十二星座嘅愛情運，一於由巨蟹座講起，保證講晒十二星座，好等大家喺2015年成竹在胸，對自己嘅愛情運瞭如指掌，開花結果！
要數今年愛情運最好嘅朋友，一定係巨蟹座莫屬，因為配偶星入主命宮，所以另一半會對你言聽計從，叫佢去東就去東，去西就去西，所以心目中已有對象嘅朋友，今年不妨出口表白，對方會輕鬆答應同你交往，特別係拍拖拍咗一段時間嘅朋友，如果想喺今年拉埋天窗，喺今年求婚絕對係最好嘅一年。但記緊一樣嘢，今年有一粒逆行星出現，事情會不進則退，無論工作定係愛情，都要不斷向前行，否則情況會有逆轉，變得事事不順。所以凡係影響愛情運嘅決定，例如出國讀書、出國培訓等，要與另一半分開一段時間嘅決定，都係要小心面對，否則一得便有一失，得到升職嘅機會，但另一方面會失去愛人，所以決定前真係要諗清楚，咪作出會令你後悔一生嘅決定。
至於未有另一半嘅朋友，建議你咪再做宅男宅女，今年多啲出嚟活動，因為靠你身邊嘅朋友嚟識另一半，注定會冇運行，所以要多啲出嚟曝光，參與些舊朋友、舊同學同埋舊同事嘅活動，就連姨媽姑姐嘅宴會聚餐，你都要不妨出現一下，因為真命天子往往就係喺呢啲地方出現。無論愛情運多旺，你都要肯出席至遇得到，否則只躲喺屋企上網、打機、煲劇，咁粒星有強大力量都幫你唔到。至於最佳出手月份，建議1至10月都運氣極佳，特別係7同8月，桃花異性緣勁旺，但一到10月之後，就會出現調整期，呢個月份前未搞掂，到10月份後就會由好運變為衰運，所以要出手嘅朋友，就要好好把握，咪蘇州過後冇艇搭，整體而言，巨蟹座嘅朋友絕對係愛情運極好嘅一年！
最佳數字：1、3、6
最佳顏色：粉藍、淺紫
最佳寶石：紫色水晶
最佳位置：人多的地方
狩獵運：★★★★
甜蜜運：4.5★
戰鬥運：★★★★★
撰文：小德