相信絕大部分男人都偏向留意女士嘅胸部，為咗吸引男士注意，好多女星都喺出鏡時大騷事業線。事實上巨乳女的確好吸引，但有一位外號「雨女」嘅索女，佢雖然上圍唔大，吸引力卻不比巨乳妹低，呢位就係矢島舞美喇！阿妹佢天生麗質，美艷不可方物，又點解會有雨女之稱呢？就要留意以下嘅介紹喇。
小弟成日都話日本藝能界極具欣賞價值，除咗演員、歌手其演技及歌藝出色，電視劇、電影作品又有水準，勝過本地千篇一律製作之外，佢地嘅歌手唔單只唱得跳得，好多都青春無限，兼且毫不吝惜身材，更擅以美色誘人，好似近期經常為內衣品牌代言嘅AKB48成員小嶋陽菜就係好例子啦！至於今日為大家介紹嘅矢島舞美亦係美少女組合嘅成員，佢拍埋陽菜身邊亦絕不輸蝕。22歲嘅舞美雖然後生，但比起好多同年紀女仔，活潑青春氣息不彰，卻帶點成熟優雅韻味，配合五官標致嘅面孔，別具風情。舞美嘅身材亦比起好多青春少女有不同之處，除咗擁有5呎5吋身高之外，其體形健美而纖巧，最特別嘅地方係腰肢幼而腹部有肌肉紋，喺日本就被稱為「筋腹」，相信阿妹平日相當勤力做仰臥起坐運動喇。
矢島舞美喺2002年，即仲係10歲嘅時候就參加組合Hello！ Project Kids甄選比賽，憑過人演出才華而被選為15名成員之一，過多兩年之後，舞美更因表現出色而獲得成為新成立嘅女子組合「℃-ute」嘅成員兼隊長一直至今。℃-ute喺舞美帶領之下發展好似火箭咁快，而且做出好成績，例如獲得日本唱片大賞嘅最優秀新人獎，以及得到演出第58屆紅白歌唱大賽嘅機會，往後亦經常出席各大演唱會獻技，而講起嚟又奇怪，大部分舞美出席演唱會嘅時候都會落雨，故令阿妹有「雨女」之稱。至於舞美以個人身份發展一樣唔錯，憑其嬌美面孔同身材多次推出寫真集，今年推出嘅《PURE EYES》就係其第八本寫真集喇。除咗幕前演出受注目，舞美參加公餘活動都十分神勇，特別喺運動方面，參加藝人運動大會「Hello！ Project SPORTS FESTIVAL 2003」就贏得60米短跑第三名，次年嘅一屆更獲得60米短跑以及1500米長跑冠軍，認真厲害！
由於矢島舞美所屬嘅組合℃-ute規定成員只可以用組合嘅官方博客發布新消息，同舞美有關嘅資訊都會喺度搵到，想了解舞美同班成員去邊度玩去邊度工作都可以上去睇。
網址：http://gree.jp/c_ute
年齡：22歲
身高：5呎5吋
三圍：32-22-33
撰文：賢