師傅教落，搵錢緊要，儲錢亦好重要，最好仲要識得將資金搵出路，千祈唔好剩係將錢死儲爛儲唔識投資，令資金停止增值。新一代人氣日本女藝人川島海荷就叻女喇，近年工作多多，搵銀自然多，而阿妹仲好識得諗，一邊搵錢一邊學玩股票添。
小弟我成日都讚日本女藝人，原因唔單只係佢哋樣子美艷迷人，以及演技了得，歌喉又有水準，勝過本地絕大部分演唔得唱又唔得嘅藝人，講句對白都「甩甩咳咳」嘅女星之外，最重要就係佢哋絕不會吝惜身材，即使主要靠唱歌同拍戲搵食，亦經常會為廣大人民嘅眼福着想換上泳裝拍寫真，川島海荷就係好例子喇。今年20歲嘅海荷樣子活潑可愛，萌味濃郁而又清新可人，見到佢甜美嘅笑容，心情幾咁憂鬱亦會覺得精神爽利，爽過執到幾皮。身材方面，海荷同好多可愛妹妹仔一樣，並非屬於豐滿型，上圍雖然唔算巨乳，但亦唔係貧乳，而腰肢纖巧則令整副身材有一點曲線美，一身雪白鮮嫩嘅肌膚更令胴體誘惑味倍增，唔錯唔錯！
川島海荷同好多女星唔同，佢個名係真名唔係藝名。阿妹個名好有意思，據聞因為佢阿嫲鍾意大海，所以父親為子女改名都一定用個海字，而個荷字就因為父親希望佢能夠好似荷花一樣，於污泥當中強壯地成長。事實證明父親對海荷嘅冀望得以實現，因為阿妹自小學六年級喺涉谷被星探發掘後，一直都工作多多，而阿妹亦一樣應付自如，佢拍戲所演出嘅角色好多都係性格堅強，「唔怕生壞命，最怕改錯名」呢句說話果然有道理。海荷出道以來演出過嘅電視劇同電影相當多，表現都備受好評，2009年就憑住《小學生殺人事件》而獲得「東京國際電視劇節」新人賞喇。除咗演戲，海荷仲係五人女子組合9nine嘅成員，唱歌一樣相當出色。海荷路數咁多，一定搵埋唔少，佢就曾經表示希望搵多啲錢可以環遊世界，而為咗令夢想更快實現，阿妹就話正努力學買股票，希望阿妹唔會變大閘蟹啦。
川島海荷近期忙住同9nine嘅一眾成員四圍演出同做宣傳，每次工作過後都會將花絮於微博透露，想緊貼海荷嘅工作動向就要睇實佢個Twitter喇。
網址：https://twitter.com/lespros_umika
撰文：賢