渡海濠情：白羊男人做事衝動

有人話白羊座嘅男朋友係最好嘅，因為佢哋對女友一往情深，但亦有人話佢哋唔好，因為太過衝動，經常自把自為，而嚟自大富豪桑拿嘅冰兒就最明白，因為佢過去有幾個男朋友都係白羊座，係咪好男友問佢就最清楚！

超強主動

冰兒話：「我拍拖唔多，但差唔多全部都係白羊座嘅男士，可能我比較被動，拍拖嘅事都係由男仔嚟主動好啲，所以行動力超強嘅白羊座朋友，就經常都比其他人，快一步向我大獻殷勤。記得中學時有四個男同學都好想追我，最後，第一個向我示愛，捉我手仔，大庭廣眾咀我嘅，就係白羊座嘅同學，其他三個同學都服咗佢，我當時只覺得佢好大膽好主動，但冇想過佢係諗都冇諗過就做，但好彩佢哋真係好聽話，一搵到你做女朋友，佢哋就會一心一意對你，唔敢一腳踏兩船，唔係畢業要分開，我睇有可能同佢結咗婚，生埋仔添。後嚟畢業入咗間髮廊做學徒，裏面個個男同事都對我嗒晒糖，但就只有一個人，敢約我去街，事後一問，原來又係白羊座嘅，唔到你唔信！」

睇唔過眼

講到咁好，講啲缺點嚟聽吓！冰兒話：「白羊座嘅男友講好聽啲就係行動力超強，反應好快，但唔好聽嗰句其實就係做事衝動，不顧後果，佢哋一覺得咁樣做係啱嘅，就會做咗至算，唔會搵人商量一下，你做佢女朋友成日見佢哋做事自把自為，冇問過你一句，你會覺得好冇癮，而且佢哋嘅決定，經常都搞到一鑊粥，甚至要你呢個女友嚟善後，你話係咪嘔血吖！最弊你叫佢哋下次有事要同我商量一下，佢哋好嘅就虛應一句，唔好嘅仲會駁嘴話你識乜嘢！一兩次仲可以忍吓，第三、四次都係咁，一定火都嚟埋，最後吵架度日，心都淡埋，所以你問我白羊座嘅男人係咪好男友？如果你唔管事，由得佢亂嚟，咁一定係好男友，但睇唔過眼，凡事都管嘅，咁想有好結果都難！」