野戰雖然好有吸引力，但係曳曳完都要有手尾，搞到環境污糟晒都算，仲要搵人嚟幫佢哋執手尾就唔係咁好啦！話說早排住喺澳洲墨爾本以東Wantirna自然公園Koomba Park嘅居民相當憤怒，皆因佢哋平日最愛喺度散步、踩單車嘅地方，有日發現喺公園一個距離停車場約100米嘅暗處，竟然有多達19個用過嘅避孕套，同埋48個開咗嘅避孕套包裝袋散落一地。心水清嘅朋友都知道，地上遺下一堆用過嘅膠衫，就知呢度最近曾經發生過連場激戰。為咗令地方變番乾淨，有人自發清潔地方，並請求警方多啲嚟巡。不過睇番過往嘅資料，其實呢個公園一直以嚟都係性戰天堂，結果喺2006年時宣布永久封閉當地嘅男廁，跟住喺2008年決定成個廁所拆晒，可惜最後仍難以禁絕野戰愛好者喺度曳曳囉！