講到當年澳門每逢大年初一晚，各妓院嘅花魁就會齊集花粉夫人像前，齊齊替妓院和自己許願，而其他囡囡，就會喺其他日子嚟上香，至於最多人揀嘅日子，就係每個月嘅十五日。一般廟宇黃昏就關門，但囡囡們只要買通廟祝，半夜三更都可以放佢哋入去參拜，相傳喺月圓之夜拜花粉夫人，效果會更好，拜完唔只愈嚟愈靚，係男人都畀佢迷住，而且真命天子亦會好快出現，帶你埋街食井水。有學者指拜月係受到拜狐仙嘅習俗影響，至於帶乜嘢嚟拜花粉夫人？由於佢叫做「花粉」，所以鮮花一定唔少得，此外，大家一定估唔到，就係花露水，以前冇香水，囡囡們為咗香噴噴，就會塗啲花露水喺身上，拜花粉夫人時，可能見大家都係女人，都會買幾支嚟供奉，但唔係放低就走人，佢哋帶嚟參拜之後就會攞走，等於我哋買燒豬拜神一樣。囡囡們話用拜過花粉夫人嘅花露水會特別有功效，男人一聞就會暈晒大浪，全心全意做你嘅溫心老契。後嚟除咗花露水，連胭脂水粉都攞埋嚟拜，最誇張嘅連肚兜都攞埋嚟，至於有冇效果真係要試過至知！