講到最受歡迎又最多人飲嘅酒類，相信一定非啤酒莫屬，只係如果諗住啤酒嚟嚟去去都係嗰幾個牌子嘅話，咁就真係大錯特錯！事關啤酒世界相當廣闊，種類更係多不勝數，風味亦不盡相同，而搜羅全球優質啤酒嘅澳門酒吧Mug's Talk，就為愛啤之人帶嚟大量選擇。好似呢期最新推介就係嚟自西班牙巴塞隆拿嘅Estrella Damm INEDIT，分別以純大麥釀造嘅Lager啤酒同麥芽小麥混釀啤酒為原料，兩者分開釀製，直到入樽前一刻先至混合一齊，令佢擁有濃郁同深沉嘅香氣同時夾雜清淡嘅果香同花香，配合清爽嘅酒體同細緻嘅氣泡，令人一試難忘，難怪佢喺2009年分別得到世界冠軍啤酒比賽及歐洲啤酒之星嘅金牌。