講起花粉夫人，原本呢位神仙係同金花夫人一對嘅，金花夫人保佑大肚婆佗仔同生產過程，至於花粉夫人就保佑產後調理同奶水充足，所以女士們想樣靚身材好，亦可以嚟求求花粉夫人保佑。但點解到咗澳門，花粉夫人就「單拖上陣」呢？話說香港百多年前，灣仔一帶剛剛填海，新區內冇乜警察管理，於是附近娼妓眾多，就由沿海嘅水兵酒吧，到電車路兩旁嘅夜總會、歌舞廳、按摩中心，到皇后大道東一帶嘅中式暗娼同企街，可以話應有盡有，咁多囡囡，佢哋都想賺多個錢，難免求助神靈，而最近嘅廟宇就係皇后大道東嘅洪聖古廟，得知花粉夫人能令佢哋變得樣靚身材好，於是紛紛走嚟頂禮膜拜，一時間香火鼎盛，連塘西名妓都經常聯群結隊走嚟參拜。而當時澳門亦係花國名城，得知花粉夫人靈驗，於是就有人請咗個花粉夫人過江，但就唔知佢同金花夫人係一對嘅，而且人哋係保佑大肚婆，而唔係囡囡，但花粉夫人一到澳門就引起囡囡們起哄，紛紛趕來參拜，惟有將錯就錯，所以澳門嘅花粉夫人就只能單拖上陣嘞！