家陣坊間啲滷水食品，好多都係買支裝嘅滷水汁返嚟整就算，冇人再會自己整滷水汁，加上家陣市面上嘅現成滷水汁味道都不錯，但講真食落硬係冇自製嘅滷水汁別具風味。正念念不忘時，前日上去澳門大富豪桑拿，行過大廳突然聞到由廚房傳出陣陣滷水汁嘅香味，而且香味獨特，同現成滷水完全唔同，於是走去問師傅搞乜嘢？佢話自己整咗煲滷水汁，打算滷啲嘢嚟食，我即時考佢，問佢落咗啲乜嘢料，佢一口氣講咗幾十種材料，連草果、草豆蔻、果皮等都落埋，證明師傅真係落足料，但發現佢香味特濃，於是再問佢仲落咗啲乜嘢咁正，佢笑笑口至講落咗花雕酒同玫瑰露酒，難怪香味特別醒神，原來有酒香。而師傅首炮就滷咗一批雞腎，問佢啲雞腎腍定爽？佢話腍同爽都有，真係為客人着想，於是我就整咗碟炆腍晒嘅雞腎嚟試吓，啲雞腎入口一咬就散晒，但裏面充滿滷水嘅香味，送飯送酒都冇得頂，家陣半夜睇波，整碟送酒，真係正到不得了！